'عمران خان ہمارے مارچ سے قبل اسمبلی توڑ دو'

 ورکرز کنونش سے خطاب کرتے ہوئے بلاول بھٹو کا کہنا تھا کہ ہمارے مارچ سے پہلے وزیر اعظم کی وکٹیں گرنا شروع ہو گئی ہیں، اسلام آباد پہنچنے سے پہلے مزید وکٹیں گریں گی۔

ان کا کہنا تھا کہ پیپلزپارٹی کا مارچ 27 فروری کو کراچی سے اسلام آباد کے لیے روانہ ہو گا۔ پہلے دن سے سلیکٹڈ حکومت کا مقابلہ کر رہے ہیں اورعوام کے سامنے بے نقاب بھی کر رہے ہیں۔

انہوں ںے کہا ہے کہ حکومت کو ہر الیکشن میں شکست کا سامنا کرنا پڑے گا، ہم نےحکومت کے خلاف اعلان جنگ کیا ہے۔

بلاول بھٹوکا کہنا تھا  کہ عمران خان کو ضمنی الیکشن میں شکست کا سامنا کرنا پڑا اور سینیٹ کے الیکشن میں بھی ہم نے خالی میدان نہیں چھوڑا،جب یہ حکومت عروج پر تھی تب پیپلزپارٹی میدان میں نکلی تھی۔

ان کا کہنا تھا کہ وزیر اعظم کے گھر میں گھس کر شکست دی اور ہمیں یقین ہے کہ عوامی مارچ میں ہم کامیاب ہوں گے، آج ملک میں مہنگائی اور بیروزگاری ہے جب کہ عوام کا حکومت سے اعتماد بھی اٹھ چکا ہے۔

ان کا مزید کہنا تھا کہ آئی ایم ایف سے ڈیل غریب اورعوام دشمن معاہدہ ہے، جب یہ لوگ آئی ایم ایف کا بل پاس کرا رہے تھے تو ہم نے ان کو وارننگ دی تھی کہ یہ عوام دشمن معاہدہ ہے۔