پی ڈی ایم کا وزیر اعظم عمران خان کیخلاف تحریک عدم اعتمادلانے کا فیصلہ 

سربراہ پاکستان ڈیموکریٹک موومنٹ  (پی ڈی ایم)    مولانا فضل الرحمان کی زیر صدارت اجلاس ہوا ، اجلاس میں  اپوزیشن لیڈر شہباز شریف ، حمزہ شہباز اور نائب صدر مسلم لیگ ن مریم نواز بھی شریک تھیں ۔

اجلاس کے بعد  پی ڈی ایم کے سربراہ مولانا فضل الرحمان نے میڈیا سے گفتگو کرتے ہوئے کہا کہ فیصلہ ہوا ہے کہ سلیکٹڈ حکمران کیخلاف عدم اعتماد کی تحریک لائی جائے گی، حکومت کی اتحادی جماعتوں سے رابطے کریں گے، حکومتی اتحادی جماعتوں سے درخواست کریں گے کہ وہ اتحاد ختم کریں۔

مولانا فضل الرحمان نے کہا کہ پی ڈی ایم کی تمام جماعتوں نے اتفاق کیا کہ ہم تحریک عدم اعتماد لائیں گے، تحریک عدم اعتماد لانے سے پہلے ہوم ورک مکمل کریں گے۔انہوں نے کہا کہ عدم اعتماد لانے کیلئے حکومت کی  اتحادی جماعتوں سے بھی رابطے کریں گے، حکومت کی اتحادی جماعتوں سے رابطوں کیلئے ٹیم تشکیل دے دی گئی ہے۔ حکومت کی اتحادی جماعتوں کے بغیر  تحریک عدم اعتماد نہیں لائی جاسکتی۔

سربراہ  پی ڈی ایم نے کہا کہ ہم سیاسی لوگ ہیں، اتفاق رائے اور سوچ سمجھ کے ساتھ فیصلے کرتے ہیں، ہم تحریک عدم اعتماد میں کامیاب ہوں گے، ہم پی ٹی آئی کے اراکین سے رابطہ نہیں کریں گے، اگر پی ٹی آئی سے کسی نے خود رابطہ کیا تو دیکھیں گے۔

شہباز شریف نے اس موقع پر کہا کہ  اللہ تعالی کو پتہ ہے کتنا ٹائم لگے گا،   کروڑوں لوگ مشکل میں ہیں،   مولانا کے پی پی پی سے تعلقات میرے اور مولانا کے تعلقات سے بھی پرانے ہیں،   عوامی خواہشات سامنے رکھ کر عمران خان کیخلاف کوشش کرینگے۔