‘پرویز الہی شہباز شریف کو چائے پلائیں گے، اس سے زیادہ ق لیگ سے کچھ نہیں ملے گا ‘ 

وفاقی وزیر اطلاعات فواد چوہدری نے میڈیا سے گفتگو کرتے ہوئے کہا کہ  وزیر اعظم 18 فروری کو منڈی بہاءالدین میں جلسے سے خطاب کریں گے ۔انہوں نے کہا کہ  پرویز الہی شہباز شریف کو چائے پلائیں گے، اس سے زیادہ ق لیگ سے کچھ نہیں ملے گا ،  ابھی تک اپوزیشن عدم اعتماد کی تاریخ بھی نہیں دے سکی،  ان تلوں میں تیل نہیں، تحریک عدم اعتماد کے لئے اپنے پاوں پر کھڑا ہونا پڑتا ہے ۔

فواد چوہدری نے کہا کہ  پی ڈی ایم کو کنٹینر چاہیے تو کرائے پر دے دیں گے ۔پاکستان کی انڈسٹری، زراعت اپنے پاوں پر کھڑی ہوچکی ہے، لوگوں کی آمدنی بڑھ رہی ہے، مہنگائی بھی کم ہوجائے گی۔ جب بھی حالات صحیح ہوتے ہیں تو چوہے نکلنے کے لئے شور مچاتے ہیں، پی ڈی ایم میں شامل سب لوگ پٹے ہوئے ہیں۔

وزیر اطلاعات کا کہنا تھا کہ  چائنہ کے کامیاب دورے کے بعد 23 سال بعد وزیر اعظم ماسکو جارہا ہے۔ کرپشن کیسز کی رفتار پر وزیر اعظم بھی غیر مطمئن ہیں ،  مقصود چپراسی کا کیس جلدی شروع ہوگا، خواہش ہے کہ کیس لائیو دکھایا جائے، شہباز شریف کمر درد کا بہانہ کرکے عدالت نہیں گئے، شام کو زرداری کی دعوت کردی ،  کچھ کام عدالتوں کے دیکھنے کے بھی ہیں۔