کورونا وائرس کے بعد ملک میں ڈینگی کا خطرہ بھی منڈلانے لگا

تفصیلات کے مطابق کورونا وائرس کے بعد ملک  میں ڈینگی  نے بھی سر اٹھا لیا ، کیس  سامنے آنے  کے بعد جڑواں شہروں سمیت تمام اضلاع میں ضلعی انتظامیہ متحرک ہوگئی ،  وزارت صحت کی جانب سے ڈینگی پر بروقت قابو پانے کے لیے اقدامات کا آغاز کر دیا گیا ۔  گزشتہ دس روز میں چودہ ہزار سے زائد گھروں کو ڈینگی وائرس کے حوالے سے مانیٹر کیا گیا ، جبکہ  اب تک 25 گھروں سے ڈینگی لاروا کی تصدیق  ہو سکی ہے ۔

 حکام وزارت صحت کے مطابق  ڈینگی کے حوالے سے حساس نوعیت کے چار سو کے قریب گھروں پر ایک سے زائد مرتبہ چیکنگ کی گئی  ہے ۔ حکام کے مطابق رواں سال اب تک جڑواں شہروں میں ڈینگی کا کوئی مریض زیر علاج نہیں ہے ۔

واضح رہے کہ ملک میں ڈینگی کی روک تھام کے پروگرام کے اعداد و شمار کے مطابق 2019 میں  ملک میں ڈینگی کے 52 ہزار 682 کیسز رپورٹ ہوئے۔ ڈینگی بخار کے شکار افراد میں سے مجموعی طور پر 92 افراد جاں بحق ہو چکے ہیں ۔