گوجرانوالہ میں پانچ روزہ پولیو مہم کا افتتاح کر دیا گیا

جی این این کے مطابق  5 روزہ پولیو مہم  کا افتتاح ڈپٹی کمشنر دانش افضال نے خانہ بدوش بچوں کو قطرے پلا کر کیا ۔ اس حوالے سے ڈپٹی کمشنر دانش افضال کا کہنا تھا کہ ضلع میں پولیو مہم 28 فروری سے 4 مارچ تک جاری رہے گی ، پولیو مہم کے دوران 17 لاکھ 17ہزار بچوں کو پولیو کے قطرے پلائے جائیں گے ۔  پولیو مہم کے لیے محکمہ صحت کی جانب سے 2890 موبائل ٹیمز ، 159 فکسڈ ٹیمز ، 66 ٹرانزٹ ٹیمیں تشکیل دی گئی ہیں۔ پولیو ٹیمیں مراکز صحت، ریلوے اسٹیشن، بس اسٹینڈز اور گھر گھر جا کر بچوں کو پولیو قطرے پلائیں گی ۔

ڈپٹی کمشنر دانش افضال کا کہنا تھا کہ  پولیو مرض کا جلد خاتمہ قومی مفاد میں ہے ،والدین اپنے 5 سال سے کم عمر ہر بچے کو دو قطرے پولیو ویکسین کے ضرور دلوائیں۔ 

واضح رہے کہ حالیہ دنوں میں   پاکستان میں پولیو کیسز میں کمی دیکھنے میں آئی ہے ،  حکام کے مطابق صرف 2020 تک پاکستان میں 84 کیسز تھے، اور اس سے پہلے 2019 میں 97، لیکن 2021 سے اب تک پاکستان میں پولیو کا صرف ایک کیس رہ گیا ہے۔