اسموگ کے تدارک کے لیے وزیر اعلی پنجاب کا بھارتی  ہم منصب کو خط لکھنے پر غور

لاہور میں دیوالی کی تقریب سے خطاب کرتے ہوئے  وزیر اعلی پنجاب مریم نواز کا کہنا ہے کہ بھارتی اور پاکستانی پنجاب کو مل کر اسموگ کے مسئلے کا حل نکالنا ہوگا۔اس موقع پر مریم نواز کا کہنا تھا کہ سوچ رہی ہوں کہ اسموگ کے معاملے پر مشرقی پنجاب کے وزیر اعلی کو خط لکھوں،مریم نواز کا مزید کہنا تھا کہ اسموگ کا مسلہ سیاسی نہیں بلکہ انسانی مسلہ ہے اس کے حل کے لیے دونوں ملکوں کے درمیان بات چیت ہونی چاہیے۔

مریم نواز کا اظہار خیال کرتے ہوئے کہنا تھا کہ مستحق اقلیتی افراد کو مانیارٹی کارڈ کے ذریعے 10 ہزار 500 روپے دیں گے، دیوالی کے تہوار پر 1400خاندانوں کے لیے فی کس 15 ہزار عیدی کا تحفہ ہے۔

وزیراعلیٰ پنجاب نے کہا کہ پاکستان میں موجود  اقلیتوں کا تحفظ ہماری اولین ترجیح ہے، سکھ،ہندو اور مسیحی سب برابر کے پاکستانی ہیں، اقلیتوں نے پاکستان کی تعمیر و ترقی میں بھرپور کردار ادا کیا ہے۔

وزیراعلیٰ پنجاب نے دیوالی کے تہوار پر ہندو برادری کو مبارکباددیتے ہوئے اقلیتوں کی خدمات کو خراج تحسین پیش کیا۔

اس موقع پر مریم نواز کا کہنا تھا کہ اقلیتوں کے ساتھ ظلم و زیادتی ہوئی، کسی نے انہیں تکلیف پہنچانے کی کوشش کی تو مریم نواز ساتھ کھڑی ہوگی، اقلیتیں ہمارے سر کا تاج ہیں، ان کا تحفظ اور احترام حکومت کی ذمہ داری ہے، کسی تفریق کے بغیر ہم سب پاکستانی ہیں۔

واضح رہے کہ لاہور میں موسم سرما کے باقاعدہ آغاز سے قبل ہی فضائی آلودگی خطرناک  حد تک بڑھ چکی ہے، اتوار کو پنجاب کا صوبائی دارالحکومت دنیا کا آلودہ ترین شہر بن گیا اور اس کا ایئر کوالٹی انڈیکس (اے کیو آئی) 707 کی انتہائی نقصان دہ حد تک پہنچ گیا تھا۔