کورونا کیسز میں اضافے کے پیش نظر اٹلی میں نئی پابندیاں عائد

تفصیلات کے مطابق  اطالوی وزیر اعظم  ماریو ڈریگی نے لوگوں کو کورونا وائرس پھیلنے کی ایک ’نئی لہر‘ سے خبردار کرتے ہوئے کہا ہے کہ ملک بھر میں  اپریل کی 5 تاریخ تک غیرضروری اشیا کی دکانیں بند رہیں گی۔  تمام دکانیں ، ریستوران اور اسکول بند رہیں گے۔ حکومت کا مزید کہنا ہے کہ شہریوں کو غیر ضروری طور پر گھروں سے نکلنے کی اجازت نہیں ہوگی۔ حکومت کے مطابق لومبارڈے ریجن میں پیر سے مکمل لاک ڈاؤن ہوسکتا ہے۔

 اٹلی میں کورونا کے نئے کیسز میں رواں ہفتے 10 فیصد تک اضافہ ہوا ہے۔ اطالوی حکومت کے مطابق وائرس کی نئی اقسام کے ساتھ کیسز میں اضافہ ہورہا ہے۔  ایسٹر پر محدود تعداد میں گرجا گھروں میں جانےکی اجازت دی جاسکتی ہے۔

 مہلک ترین وبا کورونا وائرس نے چین کے بعد سب سے زیادہ تباہی اٹلی میں مچائی تھی تاہم اطالوی حکام نے احتیاطی تدابیر پر عمل کرنے سے کرونا پر کافی حد تک قابو پالیا تھا۔ اٹلی وہ پہلا ملک تھا جس نے کیسز میں اضافے سے بچنے کیلئے پہلی بار لاک ڈاؤن نافذ کیا تھا ۔

اٹلی میں  اب تک 31 لاکھ 75 ہزار سے زائد افراد متاثر ہیں ،  ایک لاکھ ایک ہزار افراد ہلاک ہوچکے ہیں جو کہ برطانیہ کے بعد یورپی ممالک میں دوسری بلند ترین شرح ہے ۔ کیسز میں اضافے کی ایک وجہ ویکسی نیشن مہم کی تاخیر بھی قرار دیاجارہا ہے   جیسا کہ ایسٹرا زینیکا ویکسین کے استعمال کے بعد خون کی پھٹکیاں بننے کے کچھ واقعات پر کئی یورپی ممالک نے ویکسین کا استعمال عارضی طور پر روک دیا  گیا ہے۔

دوسری جانب  عالمی وبا کورونا وائرس کے سبب دنیا میں 11 کروڑ 96 لاکھ 9 ہزار سے زائد افراد متاثر اور مرنے والوں کی تعداد 26 لاکھ 51 ہزار 700 ہو گئی ہے۔  دنیا بھر میں کورونا سے صحت یاب ہونے والوں کی تعداد 9 کروڑ 62 لاکھ 55 ہزار سے زائد اور فعال کیسز کی تعداد 2 کروڑ 7 لاکھ 2 ہزار سے زائد ہے۔

واضح رہے کہ کورونا وائرس کا پہلا کیس 17 نومبر 2019 کو  رجسٹرڈ ہوا تھا ۔