جنرل باجوہ نے مجھے کہا فضل الرحمان کو’ ڈیزل ‘ نہ کہا کروں ، وزیر اعظم

جب وزیراعظم عمران خان لوئر دیر میں جلسے سے خطاب کرنے آئے تو پی ٹی آئی کے جلسے کے شرکا نے ’ڈیزل ڈیزل‘ کے نعرے لگائے۔

وزیر اعظم عمران خان نے شرکاء سے خطاب کرتے ہوئے کہا کہ  ابھی میری جنرل باجوہ سے بات ہو رہی تھی، انھوں نے کہا عمران، فضل الرحمان کو ڈیزل نہ کہنا، میں نے آرمی چیف سے کہا میں نہیں کہتا عوام نے اس کا نام ڈیزل رکھ لیا ہے۔

وزیر اعظم نے کہا کہ  قوم کسی کے سامنے جھکتی ہے تو اس ملک کی کوئی عزت نہیں کرتا، جب تک آپ میں غیرت ہے دنیا آپ کی عزت کرے گی۔اپوزیشن رہنماوں کی جانب اشارہ کرتے ہوئے انہوں نے کہا کہ  طاقت ور کو قانون کے نیچے لانا میرے منشور کا حصہ ہے۔  یہ تینوں اکٹھے ہو گئے ہیں۔

وزیر اعظم نے خطاب کرتے ہوئے کہا کہ  نواز شریف امریکی صدر کے ہاتھ میں پرچی پکڑ کر بیٹھا تھا ، اس کے ہاتھ میں پرچی تھی اور  کانپیں ٹانگ رہی تھی۔ان کا کہنا تھا کہ  مجھے یہ بھی بولا گیا کہ اس کو بھگوڑا نہ بولوں۔ جس جماعت کے سربراہ کا پیسہ ملک سے باہر پڑا ہو وہ آزاد خارجہ پالیسی نہیں بنا سکتا۔

ان کا کہنا تھا کہ  آپ کو عظیم قوم بنانا میرا فرض ہے، نہ میں کبھی کسی کے سامنے جھکا اور نہ آپ کو جھکنے دوں گا۔ تھری اسٹوجز نے ملک کے سارے ادارے تباہ کر دیے، ڈیزل نے پریس کانفرنس میں کہا کہ  جب ہم اقتدار میں آئیں گے ادارے کو ٹھیک کریں گے، مطلب فوج کو ٹھیک کریں گے،آپ کیا اداروں کو ٹھیک کرو گے آپ نے جسے ہاتھ لگایا اسے تباہ کر دیا۔

جلسے سے خطاب کو دوران وزیر اعظم عمران خان نے مزید کہا کہ  ڈیزل نے امریکی سفارتکار کو کہا میں خدمت کروں گا مجھے ایک موقع دو، آصف زرداری  امریکیوں کو خط لکھتا ہے مجھے میری فوج سے بچالو، چھوٹا شریف کہتا ہے عمران خان نے یورپی یونین کو انکار کر کے بڑا غلط کیا، شہباز شریف بھی ان کو ٹائی پہن کر کہتا ہے سر مجھے موقع دیں میں خدمت کروں گا۔