ن لیگ کا دعویٰ غلط ثابت، شہزاد اکبر نجی ٹی وی چینل کے آفس پہنچ گئے

ن لیگ پنجاب کی ترجمان عظمیٰ بخاری نے نیوز کانفرنس کرکے دعویٰ کیا تھا کہ پی ٹی آئی رہنما شہزاد اکبر ملک سے جاچکے ہیں اور کسی کے سامنے نہیں آرہے ہیں۔

انہوں نے مطالبہ کیا تھا کہ پی ٹی آئی کے باقی رہنماؤں کے نام ای سی ایل میں ڈالے جائیں تاکہ وہ ملک سے باہر نہ جاسکیں۔

لیکن  وزیراعظم کے سابق مشیر برائے احتساب شہزاد اکبر نے  نجی ٹی وی چینل کے آفس پہنچ کر ن لیگ کے اس دعوے کی نفی کردی۔

شہزاد اکبر نے نجی ٹی وی چینل  سے گفتگو کرتے ہوئے کہا کہ مسلم لیگ ن کےترجمانوں کو پتا نہیں کیا پریشانی ہے،یہ لوگ کل سے خبریں چلا رہے ہیں کہ میں ملک میں نہیں، کل ایک چینل نے بھی میرے متعلق خبر چلائی، شاید مسلم لیگ ن کو مجھ سے کچھ زیادہ ہی محبت ہے۔

شہزاد اکبر نے کہا کہ میں تو بڑی خاموشی سے اپنی چھٹیاں گزار رہا تھا لیکن ن لیگ کی مریم اورنگزیب اور عظمیٰ بخاری نے مجبور کیا تو اسٹوڈیو آیا۔

ان کا مزید کہنا تھا کہ عظمیٰ بخاری کی تسلی کیلیے میں اس وقت یہاں موجود ہوں اگر وہ چاہیں تو آکر مجھے یہاں دیکھ کر اپنی تسلی کرلیں۔