قومی اسمبلی سیکرٹریٹ نے تحریک عدم اعتماد کو ضابطے کے مطابق قرار دے دیا

ذرائع کے مطابق قومی اسمبلی سیکرٹریٹ نے وزیر اعظم عمران خان کے خلاف تحریک عدم اعتماد اور ایوان کا اجلاس بلانے کی ریکوزیشن پر اپوزیشن اراکین کے دستخطوں کی تصدیق مکمل کرلی ہے۔

پہلا مرحلہ ریکوزیشن اور دوسرا عدم اعتماد کی تحریک پر دستخطوں کی تصدیق کا تھا، دونوں مراحل مکمل ہونے اور تحریک کے ضابطے کے مطابق ہونے کا جائزہ لیا گیا۔

ذرائع کا کہنا ہے کہ تحریک عدم اعتماد اور ریکوزیشن میں کسی بھی رکن کے دستخط مشکوک یا رول آف سائن کے خلاف نہیں نکلے۔

قومی اسمبلی سیکرٹریٹ نے اپوزیشن کی عمران خان کے خلاف تحریک ضابطے کے مطابق قرار دے دی ہے۔

ذرائع کا کہنا ہے کہ اسمبلی سیکرٹریٹ نے اسپیکر کو 22 مارچ سے قبل کسی بھی دن اجلاس بلانے کی تجویز بھی دے دی ہے۔

قومی اسمبلی سیکرٹریٹ نے کہا ہے کہ اجلاس بلانا ایک آئینی تقاضا ہے جس سے انحراف نہیں کیا جاسکتا۔