وزیر اعظم سے ارکان قومی اسمبلی کی ملاقاتیں، ارکان کا وزیر اعظم پر مکمل اعتماد کا اظہار

تفصیلات کے مطابق  وزیر اعظم عمران خان سے ارکان قومی اسمبلی کی ملاقاتیں، ارکان قومی اسمبلی لال چند، شنیلا روتھ، جے پرکاش ، جمشید تھامس، چوہدری محمد عدنان، اعجاز خان جازی، صاحبزادہ صبغت اللہ، محبوب شاہ، محمد بشیر خان، جنید اکبر، صالح محمد، مجاہد علی، ملک انور تاج، ناصر خان موسیٰ زئی، شہریار افریدی، ملک فخر زمان خان، خرم شہزاد، روبینہ جمیل، راحت امان اللہ بھٹی، ملک کرامت علی، رائے محمد مرتضی اقبال، ظہور حسین قریشی اور وزیر سیفران صاحبزادہ محبوب سلطان نے وزیر اعظم سے ملاقات کی۔

ملاقات میں ارکان قومی اسمبلی نے وزیر اعظم پر مکمل اعتماد کا اظہار کیا۔ملاقاتوں میں متعلقہ حلقوں میں ترقیاتی منصوبوں پر پیش رفت اور سیاسی امور زیر غور آئے۔

اس موقع پر وزیر اعظم نے کہا کے پی ٹی آئی کی مقبولیت کا اندازہ حالیہ جلسوں میں عوام کی بڑی تعداد میں شمولیت سے لگایا جاسکتا ہے۔  پی ٹی آئی حکومت نے ہمیشہ انصاف و قانون کی بالادستی اور غریب کی فلاح کے لیے کام کیا ہے۔حکومت نے مشکل فیصلے لے کر  معیشت کو ترقی کی راہ پر گامزن کیا۔ غریب طبقے کو ریلیف فراہم کرنے کے لیے حکومت خود بھاری سبسڈی برداشت کر رہی ہے۔

 وزیر اعظم کا کہنا تھا کہ  ہمارے دور میں ریکارڈ ٹیکس اکھٹا کیا گیا جس کو عوامی فلاح پر ہی خرچ کیا گیا۔ سرکاری اخراجات میں کمی لائی گئی تاکہ وہی پیسہ ترقیاتی منصوبوں پر خرچ کیا جاسکے۔کورونا وباء نے بین الاقوامی معیشت کو نقصان پہنچایا تاہم ہماری حکومت کی پالیسیوں کو سراہا گیا۔

انہوں نے کہا کہ  زراعت، تعمیرات، بڑی صنعتوں، برآمدات اور ترسیلات زر میں تاریخی اضافہ ہماری سرمایہ کار دوست پالیسیوں کی وجہ سے ممکن ہو سکا۔ قومی صحت کارڈ، کامیاب پاکستان پروگرام، احساس پروگرام، کامیاب جوان پروگرام، نیا پاکستان ہاؤسنگ پروگرام، کسان کارڈ تخفیف غربت  اور معاشی ترقی کے لیے حکومت کے انقلابی اقدامات ہیں۔ حکومت تمام فیصلے ملک کی بہتری اور عوام کی فلاح کو مد نظر رکھ کر لیتی ہے۔

وزیر اعظم کی اراکین قومی اسمبلی کو اپنے حلقوں میں عوامی رابطے تیز کرنے اور کارکنان کو متحرک کرنے کی  ہدایت بھی کی ۔