"اتحادی جلد عمران خان کو چھوڑ جائیں گے"

مسلم لیگ ن کے رہنما احسن اقبال نے پارلیمنٹ لاجز کے باہر میڈیا سے گفتگو کرتے ہوئے کہا ہے کہ عمران نیازی نے تارکین وطن سے خطاب کیا اور گالی گلوچ کا پروگرام پیش کیا۔

انہوں نے کہا کہ سرکاری فنڈ سے کروڑوں خرچ کر کے پوری دنیا سے پارٹی عہدیداروں کو بلا کر مقابلہ حسن گالی گلوچ کیا گیا، عمران خان آج خود اکھاڑے میں اترے۔

احسن اقبال کا کہنا تھا کہ عمران نیازی اور وزراء جو للکار رہے ہیں کہ کون انکے خلاف ووٹ دے گا وہ مائی کے لعل ہیں تو ایک سو بہتر ارکان پورے کر کے دکھائیں، حکومت اکثریت کھو بیٹھی ہے، امید ہے اتحادی بھی جلد انہیں چھوڑ جائیں گے۔

مسلم لیگ ن کے رہنما کا کہنا تھا کہ انہوں نے اتحادیوں کو بھی تباہ کر دیا، ایم کیو ایم کراچی میں ایک روپیہ خرچ نہ کرنیوالوں کے ساتھ کیسے ساتھ دے گی؟ بلوچستان بریک ڈاؤن پر پہنچ چکا ہے، سندھ اور پنجاب سے اتحادی کیسے انہیں ووٹ دیں گے؟

انہوں نے کہا ہے کہ چار سال میں کاکردگی پر شرمندہ ہونے کے بجائے للکار رہے ہیں، چار سال سے آپ وزیراعظم ہیں ،تاریخ میں اتنا مضبوط اقتدار کسی کے پاس نہیں رہا جتنا آپ کو ملا، عوام بدترین مہنگائی بھگت رہی ہے ،عمران نیازی ایک سرکاری منصوبے میں کرپشن کا ثبوت پیش نہیں کر سکے۔

احسن اقبال کا مزید کہنا تھا کہ نمبر ون وزیر نے مجھ پر کرپشن کا الزام لگایا، دو سال سے انکوائری کا منتظر ہوں، سی پیک کو برباد کیا، چین کو شرمندہ کیا، جھوٹ کی سزا آج انہیں مل رہی ہے، پارٹی میں بغاوت ہو چکی ہے۔