اسلام آباد لوکل گورنمنٹ آرڈیننس کالعدم قرار

تفصیلات کے مطابق اسلام آباد ہائی کورٹ کے جسٹس محسن اختر کیانی نے اسلام آباد لوکل گورنمنٹ آرڈیننس 2021 کے خلاف محفوظ درخواستوں پر فیصلہ سنا دیا ۔ اسلام آباد ہائیکورٹ کے فیصلے میں کہا گیا ہے کہ اسلام آباد کے بلدیاتی انتخابات نئے آرڈیننس کے تحت نہیں ہو سکتے، انتخابات پرانے لوکل گورنمنٹ ایکٹ کے تحت کرائے جائیں۔

عدالت نے لوکل گورنمنٹ ایکٹ کے بجائے نئے آرڈی نینس کے تحت  بلدیاتی انتخابات سے روک دیا۔  درخواست گزاروں کی جانب سے لوکل گورنمنٹ ایکٹ کی موجودگی میں آرڈیننس کے ذریعے نیا بلدیاتی نظام لانے کو چیلنج کیا گیا تھا۔

عدالت نے فریقین کے دلائل مکمل ہونے پر 8مارچ کو فیصلہ محفوظ کیا تھا۔

درخواست گزاروں کی جانب سے بیرسٹر عمر اعجاز گیلانی، قاضی عادل، کاشف ملک اور دیگر وکلاء نے دلائل دیئے جبکہ حکومتی وکیل نے بتایا تھا کہ 19 نومبر کو پارلیمنٹ کا سیشن ختم ہوا،  23 نومبر کو آرڈیننس جاری ہوا ۔ درخواستوں میں لوکل گورنمنٹ ایکٹ کی موجودگی میں آرڈیننس کے ذریعے نیا بلدیاتی نظام لاکر چیئرمین کا کردار محدود کرنے اور آرڈیننس کے باقاعدہ قانون نہ بننے کی صورت میں منتخب نمائندوں کے مستقبل پر سوالات اٹھائے گئے تھے۔