سوشل میڈیا کمپنی میٹا نے الزام عائد کیا ہے کہ آسٹریلیا کی حکومت نے 16 سال سے کم عمر بچوں پر سوشل میڈیا کے استعمال پر پابندی کے حوالے سے قانون سازی میں جلد بازی سے کام لیا ہے۔

کمپنی کے مطابق شواہد اور نوجوانوں کی آرا کو مدنظر رکھے بغیر قانون سازی کی گئی، واضح رہے کہ اس پابندی کا اطلاق ایک سال کے عرصے میں ہوگا۔

خیال رہے کہ 28 نومبر کو آسٹریلوی ایوان نمائندگان نے ملک میں 16 سال سے کم عمر بچوں پرسوشل میڈیا کے استعمال پر پابندی کے بل کی منظوری دی تھی۔

بل کی سینیٹ سے منظوری کے بعد حکام کو کم عمر بچوں کو سوشل میڈیا پلیٹ فارمز پر آنے سے روکنے کے لیے ایک سال کے اندر سکیورٹی نظام قائم کرنا ہوگا۔

اب تک بیشتر سوشل میڈیا کمپنیوں کی جانب سے قانون پر عملدرآمد کی بات کی گئی ہے، ایسا نہ کرنے پر بھاری جرمانوں کا سامنا ہوگا۔

مگر سوشل میڈیا کمپنیوں کی جانب سے اس کے نفاذ کے حوالے سے تحفظات کا اظہار کیا گیا ہے۔

پاکستان اور بیلاروس نے دوطرفہ تعلقات کو مزید مضبوط بنانے اور تجارتی و معاشی تعاون کو فروغ دینے پر اتفاق کیا ہے۔ اس سال دونوں ممالک کے درمیان سفارتی تعلقات کی 30ویں سالگرہ منائی جا رہی ہے، جس کے موقع پر کئی اہم معاہدوں پر دستخط کیے گئے ہیں۔

پاکستان نے 1991 میں سوویت یونین کے خاتمے کے بعد بیلاروس کو تسلیم کرنے والے اولین ممالک میں شامل ہونے کے بعد تعلقات کی بنیاد رکھی۔ دونوں ممالک نے اس بات پر اتفاق کیا ہے کہ ان تعلقات کو فروری 2025 تک باقاعدہ معاہدوں کی شکل دی جائے گی۔

معاشی تعاون کو وسعت دینے، علاقائی اقتصادی انضمام کو فروغ دینے، اور قانونی فریم ورک کو مضبوط کرنے کو اہم ترجیحات میں شامل کیا گیا ہے۔ اس سلسلے میں 15 اہم معاہدوں اور مفاہمتی یادداشتوں پر دستخط کیے گئے ہیں، جن میں ”2025-2027 کے لیے جامع تعاون کے روڈ میپ“ شامل ہے، جو اقتصادی تعلقات کو مضبوط بنانے کے لیے ایک اسٹریٹجک فریم ورک فراہم کرتا ہے۔

اہم معاہدات میں ای کامرس، سائنس اور ٹیکنالوجی، منی لانڈرنگ اور دہشت گردی کی مالی معاونت کے متعلق معلومات کا تبادلہ، اور ماحولیاتی تبدیلی جیسے موضوعات شامل ہیں۔ اس کے علاوہ، دونوں ممالک نے زرعی اور صنعتی شعبے میں مشترکہ منصوبوں کو فروغ دینے پر بھی اتفاق کیا، خاص طور پر جدید زرعی مشینری کی تیاری میں۔

پاکستان میں بیلاروس کی زرعی مشینری کی فروخت اور سروسنگ کے نیٹ ورک کو وسعت دینے کی بات بھی سامنے آئی۔ مزید برآں، نیشنل لاجسٹک کارپوریشن (NLC) اور بیلٹاموزہ سروس کے درمیان مفاہمتی یادداشت پر دستخط کیے گئے تاکہ مؤثر سمندری اور زمینی راستے تشکیل دیے جا سکیں۔

زرعی مشینری کی تیاری کے لیے تعلیمی پروگرامز کے آغاز کو بھی خوش آئند قرار دیا گیا۔ صحت سے متعلق مصنوعات اور فارماسوٹیکل اشیاء کی دوطرفہ تجارت کو بڑھانے پر زور دیا گیا، جبکہ تجارتی رکاوٹوں کو دور کرنے اور مارکیٹ تک رسائی کو آسان بنانے کے لیے حکمت عملی تیار کرنے پر بھی اتفاق کیا گیا۔

وزیراعظم شہبازشریف نے فلسطینی عوام کے حق خودارادیت کیلئےغیرمتزلزل حمایت کا اعادہ کیا ہے ۔

وزیراعظم نے اپنے پیغام میں کہا کہ فلسطینی عوام کے ساتھ یکجہتی کے عالمی دن کے موقع پر میں مسئلہ فلسطین کے منصفانہ حل اور فلسطینی عوام کے حق خود ارادیت کے حصول کے لیے پاکستانی عوام اور حکومت کی حمایت کا اعادہ کرتا ہوں۔

 وزیر اعظم شہبازشریف نے کہا کہ 7اکتوبر 2023 کے بعد سے غزہ اور مغربی کنارے میں اسرائیلی جارحیت کے ضمن میں یہ سال فلسطین کی تاریخ کا انتہائی تاریک سال رہا ہے، تاریخ کے گھناؤنے ترین مظالم ڈھاتے ہوئے اسرائیل اب تک 43 ہزار  معصوم فلسطینی مردوں، خواتین اور بچوں کا قتل عام کر چکا ہے۔ فلسطینی عوام اسرائیل کی جانب سے حملوں، منظم نسل کشی اور تشدد کی مہم کو بہادری سے برداشت کر رہے ہیں، فلسطین میں اسرائیلی جارحیت انسانی حقوق اور بین الاقوامی قوانین کی صریحاً خلاف ورزی ہے۔

انہوں نے کہا کہ اسرائیل کی طرف سے بین الاقوامی انسانی حقوق کے قوانین کی خلاف ورزیوں کی وجہ سے غزہ میں عالمی برادری کی جانب سے انسانی امداد کی کوششیں بھی بری طرح متاثر ہوئی ہیں جس سے محصور آبادی کے مصائب میں شدت آئی ہے۔پاکستان عالمی برادری سے پرزور مطالبہ کرتا ہے کہ وہ فلسطین میں اسرائیل کے مظالم کو فوری روکنے کے لیے فیصلہ کن کارروائی کرے۔

انہوں نے کہا کہ شہریوں، ہسپتالوں، سکولوں اور انفراسٹرکچر پر حملوں کو روکا جائے، فلسطینیوں کے لئے بھیجے جانے والے امدادی قافلوں پر حملے ناقابل برداشت ہیں، ان سنگین جنگی جرائم اور انسانی حقوق کی بے رحم خلاف ورزیوں کے لئے اسرائیل کو جوابدہ ٹھہرانے کے حوالے سے جو استثنیٰ دیا جا رہا ہے اسی بنیاد پر اسرائیل نے غزہ اور لبنان میں مزید تباہی پھیلائی ہے۔

وزیر اعظم نے کہا کہ پاکستان غزہ میں فوری اور غیر مشروط جنگ بندی کا مطالبہ کرتا ہے اور فلسطینی عوام کے لیے بلا روک ٹوک انسانی امداد کو یقینی بنانے کی فوری ضرورت پر زور دیتا ہے۔

وزیر اعظم نے کہا کہ میں ایک بار پھر پاکستانی عوام کی جانب سے فلسطینی عوام کے ساتھ اپنی مکمل یکجہتی کا اعادہ کرتا ہوں، ہم امن، وقار اور حق خود ارادیت کے حصول کے لئے آپ کی جد و جہد میں آپ کے ساتھ کھڑے رہیں گے۔