او آئی سی وزرائےخارجہ کونسل کی سربراہی ایک سال کیلئے پاکستان کو سونپ دی گئی

تفصیلات کے مطابق اسلام آباد میں جاری او آئی سی وزرائے خارجہ اجلاس کے دوران پاکستان کو اس اہم فورم کی سربراہی سونپی گئی۔ اجلاس میں مختلف ممالک کے وزرائے خارجہ ، اوآئی سی سیکریٹری جنرل اور وفود شریک ہیں جبکہ چین کے وزیرخارجہ بطور مہمان خصوصی شرکت کررہے ہیں، وزیراعظم عمران خان اجلاس کے افتتاحی سیشن سے خطاب کریں گے۔

نائجروزیرخارجہ نے اوآئی سی وزرائے خارجہ کونسل کے اجلاس کے آغاز میں خطاب کرتے ہوئے کہ دہائیوں پہلے اوآئی سی کی بنیاد رکھی گئی ،اوآئی سی کے 48ویں اجلاس میں سب کو خوش آمدید کہتے ہیں۔ نائجر کے وزیرخارجہ نے اوآئی سی وزرائے خارجہ کونسل کے اجلاس کی صدارت پاکستان کو سونپی۔

نائجر وزیرخارجہ کا کہنا تھا کہ اوآئی سی کا مقصد تمام ممالک میں استحکام کا فروغ ہے، اوآئی سی اجلاس کے پاکستان میں انعقاد پر مبارکباد دیتے ہیں، ان کاکہنا تھا کہ انصاف اور مساوات کی بنیاد پر شراکت داری پائیدارہوتی ہے ، امت مسلمہ کودہشتگردی اور انتہاپسندی جیسے چیلنجز کا سامناہے، خطے میں کشیدگی کے خاتمے کےلئے پرعزم ہیں۔

او آئی سی ہے کیا ؟

اسلامی تعاون تنظیم اقوام متحدہ کے بعد دُنیا کی دوسری بڑی بین الاقوامی تنظیم ہے، دنیا بھر کے 57 مسلم ممالک اسلامی تعاون تنظیم کے رکن ہیں۔

او آئی سی کے فیصلوں پر عمل درآمد کا جائزہ لینے کے لئے ہر سال اجلاس ہوتا ہے . پاکستان ، سعودی عرب، ترکی،افغانستان، ایران، انڈونیشیا ،ملائشیا، اردن، کویت ، لبنان، الجزائر، چاڈ، مصر، یمن،سوڈان ،صومالیہ، فلسطین ، مراکش، نائیجیریا اور لیبیا او آئی سی کے بنیادی ارکان میں شامل ہیں۔

اسلامی تعاون تنظیم کی وزرائے خارجہ کونسل کے 47 اجلاس منعقد ہو چکے ہیں۔

پاکستان 1970، 1980، 1993 اور 2007 میں چار بار او آئی سی وزرائے خارجہ کونسل اجلاسوں کی میزبانی کرچکا ہے۔