علیم خان گروپ کا ق لیگ کو وزیر اعلیٰ کا ووٹ دینے سے انکار

تفصیلات کے مطابق ترجمان میاں خالد محمود نے کہا کہ عمران خان جن القابات سے پرویز الہٰی کو بلاتے تھے ہم دہرا نہیں سکتے ۔ ان کا یہ بھی کہنا تھا کہ پہلے 4 سال ایک نکمے بزدار کو مسلط رکھا، اب پرویز الہٰی کو نامزد کر دیا گیا ہے۔

ترجمان علیم خان گروپ نے کہا کہ کیا عمران خان کا ساتھ دینے والوں میں ایک بھی وزیر اعلیٰ کا اہل نہیں تھا؟ ہر مخلص کارکن کو پرویز الہٰی کی نامزدگی پر اعتراض ہے۔ ان کاکہنا تھا کہ اگر نیا پاکستان پرویز الہٰی بنائیں گے تو پی ٹی آئی بنانے کی کیا ضرورت تھی، کوئی سودے بازی نہیں کریں گے، اپوزیشن کا غیر مشروط ساتھ دیں گے۔

انہوں نے کہا کہ وہ پی ٹی آئی جانثار جنہوں نے نئے پاکستان میں عمران خان کا ساتھ دیا کیا اُن 184ارکان میں سے ایک بھی وزیر اعلیٰ بننے کا اہل نہیں تھا؟ تحریک انصاف کے ہر مخلص کارکن کو پرویز الٰہی کی نامزدگی پر اعتراض ہے۔

ترین گروپ کے ساتھی محب وطن اور قوم کا درد رکھنے والے ہیں، امید ہے وہ بھی ہمارا ساتھ دیں گے، جہانگیر خان ترین کی پی ٹی آئی کے لیے بہت قربانیاں ہیں، اُن کی جلد صحت یابی کے لئے دعا گو ہیں۔