مولانا فضل الرحمان کا مسلم لیگ ن کے قائد نواز شریف سے رابطہ

تفصیلات کے مطابق ٹیلی فونک رابطے میں سابق صدر آصف علی زرداری اور مریم نواز کے مابین تلخ گفتگو پر تبادلہ خیال ہوا۔ذرائع کے مطابق مولانا فضل الرحمان اور نواز شریف نے آئندہ کی حکمت عملی پر بھی غورکیا۔قائد مسلم لیگ ن نواز شریف نے کہاکہ آصف زرداری کی ایسی گفتگو سے سخت دکھ اور تکلیف پہنچی ۔ ہم تو نوے کی دہائی کی سیاست دفن کرکے آگے بڑھے تھے پھر الزام تراشی کیوں؟ اس موقع پر پی ڈی ایم سربراہ مولانا فضل الرحمان نے کہاکہ مجھے خود زرداری صاحب کے غیر جمہوری رویے سے دکھ ہوا۔

خیال رہے کہ پاکستان ڈیمو کریٹک موومنٹ  کے گزشتہ روز ہونیوالے اجلا س میں سابق صدر آصف علی زرداری نے اسمبلیوں سے استعفے مسلم لیگ ن کے قائد نواز شریف کی پاکستان واپسی سے مشروط کر دیے۔ گزشتہ روز پی ڈی ایم کے سربراہ مولانا فضل الرحمان کا کہنا تھا کہ پیپلز پارٹی نے استعفوں کے معاملے پر پارٹی مشاورت کے لیے وقت مانگا ہے۔

پی ڈی ایم کے صدر مولانا فضل الرحمٰن نے پاکستان پیپلز پارٹی (پی پی پی) کی جانب سے اسمبلیوں سے استعفے دینے کے حوالے سے حتمی فیصلے تک 26 مارچ کو شیڈول لانگ مارچ ملتوی کرنے کا  بھی اعلان کیا ۔