مولانا فضل الرحمان کا جمعہ کو یوم احتجاج منانے کا اعلان

پاکستان ڈیموکریٹک موومنٹ کے سربراہ مولانا فضل الرحمان نے پریس کانفرنس کرتے ہوئے کہا ہے کہ چند دن میں خط مرجائے گا اور ہلانے والا ہاتھ شل ہوجائے۔

انہوں نے کہا کہ 197 ارکان کوغدارقرار دیا جا رہا ہے، ارکان کوغدارقراردینا انسانیت کی توہین ہے، خط کا سہارا لے کرڈرامہ مچانا پیالی میں طوفان برپا کرنا ہے، خط کے مندرجات غلط بیان کیے جا رہے ہیں۔

مولانا فضل الرحمان نے کہا ہے کہ سیکیورٹی اداروں نے بتا دیا خط میں بیرونی سازش نہیں، عمران خان نے ملکی خزانے کومال غنیمت سمجھ لیا، مال غنیمت کوہضم کرنا اتنا آسان نہیں۔

پاکستان ڈیموکریٹک موومنٹ کے سربراہ نے کہا ہے کہ عمران خان وزیراعظم نہ ہونے کے باوجود سرکاری وسائل استعمال کررہے ہیں، سپریم کورٹ ترجیحی بنیاد پرڈپٹی اسپیکرکی رولنگ کالعدم قراردے۔

انہوں نے کہا کہ ارکان کوتحریک عدم اعتماد پرووٹنگ کاحق دیا جائے، سپریم کورٹ میں نارمل پروسیڈنگ پرتشویش ہے، ادارے آئین کے تحفظ کیلئے اپنا کردارادا کریں۔

مولانا فضل الرحمان نے کہا ہے کہ قو م بیدار ہو اور باہر نکلے، آئین کی بالادستی،جمہوریت نظریاتی بنیاد ہیں، پاکستان کی نظریاتی بنیادوں کوہلا کررکھ دیا، آئین کے ساتھ کھلواڑ رہا تو پاکستان کا وجود سوالیہ نشان بن جائے گا۔