حمزہ شہباز کے علامتی اجلاس میں وزیر اعلیٰ منتخب ہونے پر مونس الٰہی کا طنز

سماجی رابطے کی ویب سائیٹ ٹوئیٹر پر جاری پیغام میں مونس الٰہی نے طنزیہ طور پر حمزہ شہباز کو وزیر اعلیٰ بننے کی مبارکباد دی۔ انہوں نے نجی ہوٹل کا نام لیتے ہوئے کہا کہ حمزہ شہباز کو ہوٹل کا وزیر اعلیٰ بننے پر مبارک ہو۔

حمزہ صاحب مبارک ہو Faletti’s Hotel کا CM بننے پر pic.twitter.com/fA9ABd2N32

— Moonis Elahi (@MoonisElahi6) April 6, 2022

واضح رہے کہ متحدہ اپوزیشن کی جانب سے ایک نجی ہوٹل میں  پنجاب اسمبی کے علامتی اجلاس کا انعقادکیا گیا جس میں حمزہ شہباز کو وزیراعلیٰ بنانے کی قرارداد پیش کی گئی۔ پنجاب اسمبلی کے علامتی اجلاس میں حمزہ شہباز کوقائد ایوان  بنانے  کی قرار داد چودھری  اقبال گجر نے پیش کی۔ارکان نے ہاتھ کھڑے کرکے قرارداد کی منظوری دی،ایوان میں" وزیراعلی ٰ پنجاب حمزہ شہباز" کے نعرے بھی لگائے گئے۔

علامتی اجلاس میں 199 افراد نے قرارداد کی حمایت کی۔اجلاس میں قرارداد پاس ہونے پر مریم نواز نے حمزہ شہبازکو مبارکباد دی،اس دوران حمزہ کو مبارکباد دیتے ہوئے مریم نواز آبدیدہ ہوگئیں۔مریم نواز کا کہنا تھاکہ یہ فتح کے آنسو ہیں، خوشی کے آنسو ہیں۔ ان کا کہنا تھاکہ بہت جلد نواز شریف واپس آ رہے ہیں۔

پریس کانفرنس سے قبل مریم نواز نے سماجی رابطے کی ویب سائیٹ ٹوئیٹر پر ایک پیغام بھی جاری کیا جس میں انہوں نے کہا کہ حمزہ شہباز 199 ووٹ لے کر وزیر اعلیٰ پنجاب منتخب ہو گئے ہیں۔اپنے پیغام میں انہوں نے حمزہ شہباز کے وزیر اعلیٰ منتخب ہونے پر اظہار تشکر بھی کیا اور نواز شریف زندہ بعد کا نعرہ بھی لگایا۔