شاہ محمود قریشی کی اپوزیشن کو دھمکی آمیز خط پر تحقیقات کی پیشکش 

تفصیلات کے مطابق سپریم کورٹ کے باہر میڈیا سے گفتگو کرتے ہوئے   پاکستان تحریکِ انصاف کے رہنما شاہ محمود قریشی   نے  سپریم کورٹ ازخود نوٹس کیس سے متعلق کہا کہ  لگتا ہے کہ اس اہم کیس کی آج آخری نشست ہے، ہمارے وکلاء اپنے دلائل آج مکمل کر لیں گے، آرٹیکل 69 کی روح ہے کہ پارلیمنٹ کے معاملات پارلیمنٹ میں رہنے چاہئیں، اسپیکر کی رولنگ فائنل ہوتی ہے۔

شاہ محمود قریشی کا کہنا ہے کہ ہمارے آئین کے مطابق ریاست کے ہر عضو کی اپنی ذمے داری ہے، آئین بنانے والوں نے بڑا واضح مؤقف دیا ہوا ہے۔ انہوں نے کہا کہ مشترکہ اپوزیشن کہہ رہی ہے کہ ڈپٹی اسپیکر نے آئین شکنی کی ہے، تحریکِ انصاف کا مؤقف ہے کہ اسپیکر کے پاس رولنگ کا مکمل اختیار ہے۔

انہوں نے کہا کہ آرٹیکل 69 نے اسپیکر کی رولنگ کو تحفظ دیا ہے، اسپیکر کی رولنگ قابلِ سماعت نہیں۔ڈپٹی اسپیکر نے کہا کہ نئی صورتِ حال سامنے آئی ہے جسے سامنے رکھا۔

انہوں نے کہا کہ یہ اپنی بوکھلاہٹ میں اپنے مقاصد کو حاصل کرنے کے لیے ملک کو آئینی بحران میں دھکیل رہے ہیں، ساڑھے تین سال یہ کہتے رہے کہ ملک کو نئے انتخابات کی ضرورت ہے ،پیپلزپارٹی اور ن لیگ نے 5 سال پورے کئے،ہمیں ان نے 5 سال پورے کرنے نہیں دیئے یہ بہت سنجیدہ صورتحال ہے،عدلیہ کا فیصلہ آئے گا ہم منتظر ہیں۔

شاہ محمود قریشی نے کہا کہ موجودہ صورت میں واحد حل فریش مینڈیٹ ہے،عوام نے فیصلہ کرنا ہے کہ ملک کی باگ ڈور کس کے ہاتھ میں دیں ۔