وزیراعظم کی رمضان میں عوام کیلئے میٹرو بس سروس مفت چلانے کی ہدایت

تفصیلات کے مطابق وزیراعظم شہباز شریف آج صبح سویرے پشاور موڑ میٹرو بس منصوبے کا جائزہ لینے پہنچے اور منصوبے کو 16 اپریل کو عوام کے لیے چلانے کا حکم دیتے ہوئے منصوبے میں ہونے والی تاخیر کی انکوائری کا حکم بھی دیا۔

ترجمان مسلم لیگ ن مریم اورنگزیب کی جانب سے وزیراعظم کے میٹرو بس اسٹیشن کے دورے کی تصاویر بھی سوشل میڈیا پر شیئر کی گئی تھیں۔

پاکستان مسلم لیگ نون کی ترجمان مریم اورنگزیب نے ایک بیان میں کہا کہ وزیراعظم شہبازشریف نے رمضان المبارک کے دورا ن مسافروں کے لئے میٹروبس سروس مفت چلانے کی ہدایت کی ہے۔

مریم اورنگزیب نے کہاکہ وزیراعظم نے بھارہ کہو اورروات روٹس پرمیٹروبس سروس کی جائزہ رپورٹ تیار کرنے کی بھی ہدایت کی ہے ۔

ترجمان نے کہا  کہ وزیراعظم نے ہدایت کی ہے کہ اسلام آباد اورملحقہ علاقوں کے شہریوں کے لئے سفر کی معیاری سہولتوں کی فراہمی یقینی بنائی جائے۔