پاکستان اورسری لنکا کی خواتین ٹیموں کے مابین سیریز کا شیڈول جاری

پی سی بی کے مطابق پاکستان اور سری لنکا کی ٹیموں کے درمیان 3 ون ڈے میچز کھیلے جائیں گے،  دونوں ٹیموں کے مابین تین ون ڈے انٹرنیشنل میچز کی سیریز یکم جون سے شروع ہوگی ، باقی دو میچز تین اور پانچ جون کو کھیلے جائیں گے، یہ تمام میچز کراچی کے ساؤتھ اینڈ کلب میں کھیلے جائیں گے۔

سیریز میں شرکت کے لیے دونوں ٹیمیں 19 مئی کو کراچی پہنچیں گی ، یہاں تین روزہ ٹریننگ سیشن کے بعد دونوں ٹیموں کے مابین ٹی ٹوئنٹی سیریز کا آغاز ہوجائے گا۔ 

سیریز کے تین ٹی ٹوئنٹی انٹرنیشنل میچز 24، 26 اور 28 مئی کو کھیلے جائیں گے۔

اس سیریز کے لیے قومی خواتین کرکٹ ٹیم کا 11 روزہ تربیتی کیمپ نیشنل اسٹیڈیم کراچی کے اکیڈمی اوول میں منعقد ہوگا، کیمپ میں 26 خواتین کرکٹرز کو طلب کیا جائے گا۔

قومی خواتین کرکٹ ٹیم کی کپتان بسمہ معروف کا کہنا ہے کہ آئی سی سی ویمنز چیمپئن شپ کے میچز اپنے ملک میں کھیلنا اعزاز کی بات ہے، وہ سری لنکا کے استقبال کے لیے بہت پرجوش ہیں۔

انہوں نے کہا کہ اس سیریز کے ذریعے وہ اپنے کرکٹ سیزن کے نئے سرے سے آغاز کی منتظر ہیں ، یقین ہے قومی خواتین کرکٹ ٹیم سیریز میں بہترین کارکردگی کا مظاہرہ کرے گی ۔

اس سیریز کے اختتام پر قومی خواتین کرکٹ ٹیم سہ فریقی ٹی ٹوئنٹی سیریز میں شرکت کے لیے آئرلینڈ پہنچے گی ، جہاں تیسری ٹیم آسٹریلیا کی ہوگی ، اس کے بعد اسکواڈ کامن ویلتھ گیمز میں شرکت کے لیے برمنگھم روانہ ہوجائےگا۔

آئی سی سی ویمنز چیمپئن شپ کا یہ تیسرا ایڈیشن ہے، پاکستان میں کورونا کی وباء پر قابو پانے کے بعد یہ پہلی انٹرنیشنل سیریز ہوگی، لہٰذاان میچز کے لیے منیجڈ انورنمنٹ میں نرمی کی جائے گی ۔

سیریز سے قبل تمام کھلاڑیوں، آفیشلز اور اسپورٹ اسٹاف کی کوویڈ 19 ٹیسٹنگ کی جائے گی، جس شخص کا کوویڈ 19 ٹیسٹ مثبت آئے گا اسے پانچ روز کے لئے آئسولیشن میں بھیج دیا جائے گا۔