کون بنے گا وزیراعلیٰ پنجاب؟ انتخاب آج ہوگا 

تفصیلات کے مطابق صوبے میں 21 ویں قائد ایوان کے انتخاب کا میدان آج سجے گا۔  پنجاب اسمبلی کا اجلاس آج صبح ساڑھے 11 بجے ہوگا۔

 ڈپٹی سپیکر سردار دوست محمد مزاری انتخابی عمل کے لئے منعقدہ اسمبلی اجلا س کی صدارت کریں گے۔

حمزہ شہباز پاکستان مسلم لیگ نون ا ور اتحادی جماعتوں کی طرف سے امیدوار ہیں جبکہ چوہدری پرویز الٰہی تحریک انصاف اور پاکستان مسلم لیگ (ق) کے امیدوار ہیں۔

پنجاب اسمبلی کے کُل 371 ارکان میں سے وزیراعلیٰ بننے کے لیے 186 ووٹ درکار ہیں۔ پرویز الٰہی کا دعویٰ ہے کہ انہیں 189 ارکان کی حمایت حاصل ہے جبکہ حمزہ شہباز کہتے ہیں 200 سے زائد ایم پی ایز ساتھ ہیں۔

دوسری جانب پنجاب اسمبلی کے اہم اجلاس کیلئے قائمقام سی سی پی او شہزادہ سلطان  نے  سکیورٹی ہائی الرٹ کر نے کی ہدایت کردی ۔ سربراہ لاہور پولیس کاکہنا ہے کہ اسمبلی آنے والے معزز اراکین کو بھرپور سکیورٹی فراہم کی جائے گی. 

محکمہ  داخلہ کے نوٹیفیکیشن کے مطابق پنجاب اسمبلی کی مقررکردہ حدود میں دفعہ 144 کا نفاذ یقینی بنائیں گے ۔ پنجاب اسمبلی کی عمارت اور اطراف میں سکیورٹی انتظامات مزید سخت کر دیئے جائیں ، دوران الیکشن کسی بھی رکاوٹ کے تمام ممکنہ خدشات کا خاتمہ یقینی بنائیں گے ۔

سربراہ لاہور پولیس  کے مطابق کسی بھی شخص کو قانون ہاتھ میں لینے کی ہرگز اجازت نہیں دی جائے گی ۔ ان کاکہنا تھا کہ  لا اینڈ آرڈر برقرار رکھنا،شہریوں اور سرکاری املاک کی حفاظت اولین ترجیح ہے، ایس پیز،ایس ڈی پی اوز،ایس ایچ اوز سمیت 2000 سے زائد افسران اور جوان تعینات کئے گئے  ہیں۔