وزیراعظم  کا راول چوک فلائی اوور کا دورہ ،منصوبہ جلد مکمل کرنے کی ہدایت 

تفصیلات کے مطابق  وزیراعظم شہبازشریف  نے راول چوک فلائی اوور کا دورہ کیا، اس موقع پر وزیراعظم شہباز شریف کو جاری تعمیراتی  کام پر بریفنگ دی گئی۔ 

 وزیراعظم شہباز شریف نے  کہا کہ منصوبےکاآغازاکتوبر2020میں ہواتھا لیکن مکمل نہ ہو سکا،  کمپنی کی نااہلی کی وجہ سے منصوبے پر کام مکمل نہ ہوسکا، منصوبہ ستمبر تک مکمل ہوجانا چاہیے اور اسکی تکمیل میں معیار پر کوئی سمجھوتا برداشت نہیں کروں گا۔

شہباز شریف نے کہا کہ کمپنی کونااہلی کےباعث بلیک لسٹ کیوں نہیں کیا گیا، ماضی میں اس طرح کےمنصوبے6 ماہ کےعرصےمیں مکمل کیےگئے،  ناقص منصوبہ بندی کی وجہ سے عوام کو مشکلات کا سامنا ہے، غریب عوام کاپیسہ ضائع کیاجارہاہے،غیرذمہ داری کی انتہا کی جارہی ہے،  منصوبے میں تاخیر کیوں ہوئی، کمیٹی بنا کر انکوائری کرائیں۔

وزیراعظم کا کہنا تھا کہ 2 سال میں میگا پروجیکٹ بن جاتے ہیں ، ہم نے کئی فلائی اوور 72 روز میں بھی مکمل کیے ہیں ، منصوبےکی تکمیل میں کوالٹی پرکوئی سمجھوتہ نہیں کیاجائے گا۔

انہوں نے کہا کہ  آپ ایک چھوٹے سے منصوبے کو 2 سال دے رہے ہیں، اس سے کیا تاثر جائے گا۔ منصوبے کی تحقیقات تھرڈ پارٹی سےکرائی جائیں۔

وزیراعظم کا کہنا تھا کہ میں کئی ماہ سے یہاں سے گزر رہا ہوں، کام بند پڑا تھا، 2 ماہ سے منصوبے پر کام بند پڑا ہے۔