قومی اسمبلی اجلاس آج طلب ، ڈپٹی اسپیکرکیخلاف تحریک عدم اعتماد پرووٹنگ ہوگی 

تفصیلات کے مطابق قومی اسمبلی اجلاس کی صدارت سابق سپیکر ایاز صادق کرینگے ، ڈپٹی سپیکر قومی اسمبلی قاسم سوری کے خلاف عدم اعتماد کی تحریک پر ووٹنگ آج ہوگی ،  متحدہ اپوزیشن نے قومی اسمبلی کے ڈپٹی اسپیکرقاسم سوری کے خلاف بھی تحریک عدم اعتماد جمع کروائی تھی۔

قومی اسمبلی کے قاعدہ 12 کے تحت ڈپٹی سپیکر کی برطرفی کی کارروائی ہوگی ، ایک چوتھائی اراکین قاسم سوری کے خلاف پیش کی گئی عدم اعتماد کی تحریک کے حق میں کھڑے ہونگے ،  تحریک منظور ہونے کی صورت میں ڈپٹی سپیکر کو ان کے عہدے سے ہٹانے کی قرارداد پیش کی جائے گی ۔ 

ڈپٹی سپیکر کے خلاف ووٹ خفیہ رائے شماری کے ذریعے ڈالے جائیں گے، پینل آف چیئرمین اس حوالے سے طریقہ کار کا اعلان کرے گا  اور قرار داد کثرت رائے سے منظور ہونے کے بعد ڈپٹی سپیکر کو ان کے عہدے سے برطرف کردیا جائے گا ۔  جس کے بعد سیکرٹری قومی اسمبلی ڈپٹی سپیکر کی برطرفی کا نوٹیفیکیشن جاری کرے گا ۔ 

قومی اسمبلی سیکریٹریٹ کا مزید کہنا ہے کہ قواعد وضوابط کے قاعدہ 12 کے تحت قاسم سوری اجلاس کی صدارت نہیں کریں گے۔پینل آف چیئر پرسن میں شامل پی ٹی آئی کے تینوں ارکان مستعفی ہوچکے ہیں۔

یاد رہے کہ ڈپٹی اسپیکر قاسم سوری نے 9 اپریل کو قومی اسمبلی کا اجلاس 16 اپریل تک ملتوی کیا تھا لیکن پھر بعد میں اجلاس کی تاریخ بدل کر 22 اپریل کر دی گئی تھی۔ اسی دوران ڈپٹی اسپیکر نے پاکستان تحریک انصاف کے منحرف 123 اراکین کے استعفے بھی منظور کر لیے تھے۔

نئے اسپیکر کا انتخاب 

قومی اسمبلی کے ایجنڈے میں اسد قیصرکے استعفے کے بعد نئے اسپیکر کا انتخاب بھی شامل ہے ۔ پیپلز پارٹی کے راجا پرویز اشرف بلا مقابلہ اسپیکر منتخب ہوچکے ہیں ، وہ آج عہدے کا حلف اٹھائیں گے۔  ان کی کامیابی کا اعلان ایوان میں کیا جائے گا ، اسپیکر سے حلف پینل آف چیئرمین کے رکن ایاز صادق لیں گے ، سپیکر منصب سنبھالنے کے بعد ڈپٹی سپیکر کے انتخاب کے شیڈول کا اعلان کرے گا۔ 

حکومت اوراتحادی جماعتوں کا اہم اجلاس

دوسری جانب وزیراعظم شہبازشریف نے حکومت اوراتحادی جماعتوں کا اجلاس آج طلب کرلیا۔ اجلاس آج 11 بجے پارلیمنٹ ہاؤس میں ہوگا جس میں نئے اسپیکر کے حلف اورڈپٹی اسپیکر کیخلاف عدم اعتماد پرمشاورت ہوگی۔ تمام ارکان کواجلاس میں شرکت کی ہدایات جاری کردی گئی ہیں۔