اچھے پولیس افسران اور اچھے بیوروکریٹ لےکرآئیں گے:حمزہ شہباز

تفصیلات کے مطابق پنجاب اسمبلی میں آج وزیر اعلیٰ پنجاب کا انتخاب ہوا جس میں حمزہ شہباز، چودھری پرویز الٰہی کے مقابلے میں 197 ووٹ لے کر کامیاب قرار پائے۔

وزیر اعلیٰ پنجاب منتخب ہونے کے بعد پنجاب اسمبلی میں خطاب کرتے ہوئے حمزہ شہبازنے کہا کہ وہ  اچھے پولیس افسران اور اچھے بیوروکریٹ کو لےکرآئیں گے۔

اپنے خطاب میں ان کا کہنا تھا کہ آج جمہوریت کی فتح ہوئی ہے، عوام اور حکومت کے درمیان خلا کو ختم کریں گے۔

انہوں نے کہا کہ ڈپٹی اسپیکر کی بہادری کو خراج تحسین پیش کرتا ہوں، ہائی کورٹ نے ڈپٹی اسپیکر کو اختیارات دیے لیکن آج آئین وقانون کا مذاق اڑایا گیا اور ڈپٹی اسپیکرپرحملہ کیا گیا۔

بطور وزیر اعلیٰ اسمبلی سے اپنے پہلے خطاب میں کہا کہ ہم انتقام نہیں لیں گے، قانون اپنا راستہ اپنائے گا، ہماری حکومت عوامی حکومت ہوگی۔

اپنے خطاب میں انہوں پیپلز پارٹی کے حسن مرتضیٰ، تحریک انصاف کے عبد العلیم خان اور جہانگیرترین سمیت دیگر کا شکریہ ادا کیا۔

انہوں نے کہا کہ آج اسمبلی میں جو کچھ ہوا اس کی انکوائری کرائیں گے اور جو ملوث ہوگا اس کے خلاف بھرپور کارروائی کی جائےگی۔