اصل میر جعفر اور میر صادق نواز شریف اور شہباز شریف ہیں

چیئرمین پاکستان تحریک انصاف عمران خان نے پارٹی رہنماؤں سے خطاب میں کہا کہ اصل میر جعفر اور میر صادق نواز شریف اور شہباز شریف ہیں۔ 

انہوں نے کہا کہ اوورسیز پاکستانی محنت مزدوری کر کے ملک میں پیسہ بھیجتے ہیں اور کرپٹ، ملک کے غدار یہ چور اور ڈاکو یہاں سے پیسہ چوری کر کے باہر بھیج دیتے ہیں، میں لندن کو جانتا ہوں، پاکستان کا تین دفعہ وزیر اعظم رہنے والا نواز شریف لندن کے مہنگے ترین علاقے میں ٹھہرا ہوا ہے۔

نواز شریف کا ایک بیٹا 9 ارب روپے کے گھر میں رہ رہا ہے، یہ سارے اربوں پتی ہیں، ان کی پراپرٹیز اور آفشور اکاؤنٹس سارے لندن میں ہیں،اور جواب نہیں دیتے کہ یہ سارا پیسہ آیا کہاں سے ہے، ملک میں بس لوٹنے آتے ہیں، یہ ہیں غدار اس ملک کے، یہ ہیں میر جعفر اور میر صادق۔ 

انہوں نے وزیر اعظم شہباز شریف ہدف تنقید بناتے ہوئے کہا کہ آج قومی اسمبلی میں شہباز شریف نے ڈرامہ کیا کہ عمران خان نے فوج کی توہین کر دی ہے، یہ سارا خاندان ہی جھوٹوں کا ہے، ان سے سچ بولا ہی نہیں جاتا، میرا کل جہلم میں جلسہ ہے، شہباز شریف میں صحیح معنوں میں تمہارا جواب کل دوں گا کہ میں نے کتنی توہین کی اور تم غداروں نے اس ملک کے ساتھ کیا کیا۔

انہوں نے وزیر اعظم شہباز شریف کو مخاطب کرتے ہوئے کہا کہ تم اور تمہارا بھائی اصل میر جعفر اور میر صادق ہو اس ملک کے، ملک سے پیسہ چوری کر کے باہر لے جاتے ہو اور آکر این آر او لے لیتے ہو۔

واضح رہے کہ اس سے قبل قومی اسمبلی سے خطاب میں وزیر اعظم شہباز شریف نے سابق وزیر اعظم عمران خان کے ایبٹ آباد جلسے سے خطاب کا حوالہ دیتے ہوئے کہا تھا کہ عمران نیازی نے سراج الدولہ اور میر جعفرکا ذکر کر کے اداروں کو نشانہ بنایا ہے۔