گورنر پنجاب عمر سرفراز چیمہ عہدے سے برطرف ، نوٹی فکیشن جاری

کیبنٹ ڈویژن کی جانب سے جاری نوٹیفیکیشن کے مطابق  گورنر پنجاب عمر سرفراز چیمہ کو ہٹائے جانے کی سمری کے دن پورے ہونے کے بعد، آئین اور ضابطے کے مطابق، گورنر پنجاب کو ڈی نوٹیفائی کر دیا گیا۔ 

جاری نوٹیفکیشن میں کہا گیا ہے کہ گورنر پنجاب کو وزیراعظم کی ایڈوائس پر عہدے سے ہٹایا گیا۔

رپورٹس کے مطابق اسپیکر پنجاب اسمبلی چودھری پرویز الٰہی قائم مقام گورنر کے فرائض انجام دیں گے ۔آرٹیکل 104 کے تحت نئے گورنر کی تعیناتی تک قائم مقام عہدے پر کام کریں گے ۔ 

دوسری جانب  گورنر ہاؤس  کے باہر پولیس کی بھاری نفری تعینات کردی گئی ہے ۔   ذرائع پنجاب حکومت کے مطابق  گورنر پنجاب عمر سرفراز چیمہ کی برطرفی کے بعد انکی سیکیورٹی ہٹا دی گئی ، ذرائع کاکہنا ہے کہ عمر سرفراز چیمہ اب گورنر نہیں رہے تو اب ان کو سیکورٹی نہیں دی جا رہی ۔

پولیس ذرائع کاکہنا ہے کہ اگر عمر سرفراز چیمہ گورنر ہاؤس آئے تو انہیں داخل نہیں ہونے دیا جائے گا۔

قبل ازیں صدر مملکت عارف علوی نے گورنر پنجاب کو ہٹانے کی وزیراعظم کی ایڈوائس مسترد کردی تھی۔

صدر کا کہنا تھا کہ گورنر پنجاب کو صدر کی منظوری کے بغیر نہیں ہٹایا جاسکتا، آئین کے آرٹیکل 101 کی شق 3 کے مطابق گورنر، صدر کی رضامندی تک رہے گا۔

وزیر داخلہ رانا ثنا اللّٰہ نے صدر عارف علوی کو پیغام میں کہا تھا کہ صدر مملکت وزیراعظم کی ایڈوائس کے پابند ہیں، اس سے ہٹنا آئین شکنی ہوگی۔