اومی کرون کیسز : وزیر اعظم نے این سی اوسی کو بحال کرنے کا حکم دے دیا

تفصیلا ت کے مطابق وزیراعظم شہباز شریف  نے ملک میں اومی کرون کی نئی قسم کے پہلے کیس کی تصدیق کے بعد نیشنل کمانڈ اینڈآپریشن سنٹر (این سی اوسی ) کو فوری طور پر بحال کرنے کی ہدایت کردی ۔ 

وزیراعظم نے وزارت قومی صحت سے موجودہ صورتحال کے متعلق رپورٹ  بھی طلب کرلی ہے ۔ 

وزیر اعظم شہباز شریف کا اومیکرون وائرس کی نئی ساخت کے بڑھتے ہوئے کیسیز کا نوٹس۔

فوری طور پر NCOC کو بحال کیا جائے۔ وزیر اعظم کی ہدایت

وزارت قومی صحت سے موجودہ صورتحال کے متعلق رپورٹ طلب۔

— Prime Minister's Office (@PMO_PK) May 10, 2022

گزشتہ روز قومی ادارہ صحت (این آئی ایچ)  نے  پاکستان میں اومی کرون کے نئے سب ویریئنٹ کے پہلے کیس کی تصدیق  کی تھی ۔   پاکستان میں ’جینوم‘ کی ترتیب کے ذریعے سب ویریئنٹ کی تصدیق ہوئی ہے ، نئے ویریئنٹ کی وجہ سے مختلف ممالک میں کیسز کی تعداد میں بھی اضافہ ہو رہا ہے۔

قومی ادارہ صحت  نے اومی کرون کے نئے ویریئنٹ سے بچاؤ کے لیے احتیاطی تدابیر اپنانے پر زور دیتے ہوئے کہا ہے کہ عوام ہجوم والی جگہوں پرماسک پہنیں ، شہری اپنی ابتدائی ویکسین مکمل کروائیں اور ویکسینیشن مکمل ہونے کے 6 مہینے کے بعد بوسٹر ڈوز لگوائیں۔

خیال رہے پاکستان میں گزشتہ 24 گھنٹوں کے دوران کرونا وائرس سے کوئی ہلاکت نہیں ہوئی اور گزشتہ 24 گھنٹوں کے دوران کرونا وائرس کے 31 نئے کیسز رپورٹ ہوئے۔ 

واضح رہےکہ این سی او سی ملک میں کورونا وبا پھیلنے کے بعد گزشتہ دور حکومت میں قائم کیا گیا تھا جس کی سربراہی اسد عمر کررہے تھے ، تاہم پی ٹی آئی حکومت نے ملک میں کورونا کیسز کی شرح کم ہونے پر اپریل میں ادارے کو وزارت صحت میں ضم کردیا تھا۔