عدالتوں سے پوچھتا ہوں کہ آپ کے سامنے ملک تباہ ہورہا ہے،آپ کیا کررہے ہیں:عمران خان

سابق وزیر اعظم عمران خان نے سیالکوٹ میں ایک بڑے عوامی اجتماع سے خطاب میں کہا کہ عاجزی سے اپنی عدلیہ سے پوچھتا ہوں کہ میں تو بہت خطرناک تھا اور پتا نہیں ملک سے کون سی غداری کرنے جا رہا تھا کہ آپ نے رات 12 بجے عدالتیں کھول دیں،لیکن جن کو مسلط کیا گیا،یہ اپنے کرپشن کیسز کے ساتھ جو کررہے ہیں،دنیا میں کہیں ایسا ہوسکتا ہے، آپ کے سامنے ملک تباہ ہورہا ہے،آپ کیا کررہے ہیں؟عدالتوں سے کہتا ہوں کہ اگر آپ نے ان بڑے چوروں کو نہیں پکڑنا تو جیلوں کے دروازے کھول دیں،ان غریبوں کا کیا قصور ہے جو غربت اور بچوں کا پیٹ پالنے کے لیے چوری کرتے ہیں۔ پورے پاکستان کی جیلوں میں چھوٹی چوری کرنے والے غریب چوروں کی چوری ملا کر بھی ایک مقصود چپڑاسی کے 4 ارب کی کرپشن سے کم ہوگی۔ جو بھی مافیا کے کسیز کی تحقیقات کرتا ہے،اس پر دباؤ ڈالا جاتا ہے اور اس کی جان لے لی جاتی ہے، ڈاکٹر رضوان کی وفات کے بعد ایک اور آفیسر کو ہارٹ اٹیک ہوا ہے،کدھر ہیں میری عدالتیں؟۔

اپنے خطاب میں سابق وزیر اعظم نے کہا کہ نوازشریف نے اپنی زندگی کوئی کام بھی ایمانداری سےنہیں کیا،جب کرکٹ کھیلتا تھا اپنے امپائر کھڑے کرتا تھا،اس نے کاروبار ایمانداری سے کیا نہ الیکشن ایمانداری سے لڑا، نواز شریف نے کبھی سچ نہیں بولا۔مشرف کے دور میں نوازشریف ڈیل کرکے دم دبا کر باہر بھاگ گیا اور اس بار کہا کہ میں بہت بیمار ہوں، مرنے والا ہوں اور ڈرامہ کرکے لندن چلا گیا،نواز شریف نے لندن بھاگنے کے لیے بیماری کی جو ایکٹنگ کی اس کو بالی وڈ میں رول مل سکتا ہے، پہلے تو ایسے لگا کہ پتا نہیں یہ سیڑھیاں بھی چڑھ پائے گا یا نہیں لیکن جہاز دیکھ کر ہشاش بشاش ہوگیا اور لندن ہوا لگی تو ساری بیماریاں ختم ہو گئیں۔

انہوں نے کہا کہ میں نے اپنے ساڑھے 3 سالہ دور حکومت میں پوری کوشش کی کہ 30 سال سے کرپشن کرنے والوں کو سزا ملے لیکن اس ملک میں اہم عہدوں پر بیٹھے ہوئے کرپشن کو برا نہیں سمجھتے،اس ملک میں طاقتور عہدوں پر بیٹھے ہوئے لوگ بڑے بڑوں کی کرپشن کو برا نہیں سمجھتے،وہ اس بات کو قبول کر بیٹھے ہیں کہ بڑے بڑے لوگ کرپشن کرتے ہیں لیکن ان کو کوئی پکڑ نہیں سکتا۔

چیئرمین تحریک انصاف نے کہا کہ اگر قوم میرے ساتھ نہ نکلی تو پاکستان تباہ ہوجائے گا،ہم ایک اللہ کی عبادت کرتے ہیں اور اسی سے مدد مانگتے ہیں، ہم کسی انسان اور سپر پاور کے سامنے نہیں جھکتے، ہم نبی کریمﷺ کے امتی ہیں، کسی کے سامنے نہیں جھکتے نہ غلامی کرتے ہیں، لاالہ الاللہ ہمیں غیرت دیتا ہے، ہم ایک غیرت مند قوم ہیں، تحریک پاکستان کے بعد یہ دوسری بڑی تحریک ہے،جس طرح کی قربانیاں پاکستان کو آزاد بنانے میں دی گئی تھیں،اسی طرح کی قربانیاں حقیقی آزادی کے لیے دینے کا وقت آگیا ہے۔

خواجہ آصف پر تنقید کرتے ہوئے انہوں نے کہا کہ خواجہ وینٹی لیٹر کہتا ہے پاکستان وینٹی لیٹر پر ہے امریکہ کی ضرورت ہے، خواجہ وینٹی لیٹر تمہاری جماعت اور پی پی نے ملک پر 30 سال حکومت کی، ان لوگوں نے ملک کو چوس چوس کر مقروض کردیا، ایک چیری بلاسم ہے جو کہتا ہے بھکاری کبھی اپنی مرضی نہیں چلا سکتا، مجھ سمیت پاکستانیوں کو امریکہ کی غلامی کسی صورت قبول نہیں۔