کیا ہماری تقدیر میں لکھا ہے کہ غریب اور بھکاری رہیں:وزیراعظم

کراچی میں تقریب سے خطاب کرتے ہوئے وزیر اعظم شہباز شریف نے کہا کہ گزشتہ حکومت کو جب عدم اعتماد کی کامیابی کا پتا چلا تو پیٹرول کی قیمتیں سستا کرنے کا مشورہ دے دیا، یہ اگلی حکومت کے لیے جال بچھایا جارہا تھا، ہماری ایک سیاسی مجبوری بھی تھی سرمنڈتے اولے پڑے۔

انہوں نے کہ کہا پچھلے ساڑھے 3 سالوں میں حکومت نے عام آدمی کوایک دھیلے کا ریلیف نہیں دیا، قرضے ہی قرضے لیے گئے۔ ماضی کی حکومت نے 22ہزارارب کے قرضے لیے، گزشتہ ساڑھے 3 سالوں میں 80 فیصد قرضوں میں اضافہ ہوا، لاڈلی حکومت اور لاڈلے کو مقتدر ادارے نے 75سالہ تاریخ میں مثالی سپورٹ دی، ایسی اگر ہماری حکومت کو 30 فیصد سپورٹ بھی ملتی تو پاکستان راکٹ کی طرح اوپرجارہا ہوتا۔

 امپورٹڈ اشیا پر پابندی کے حکومتی اقدام کو دردست قرار دیتا ہوئے وزیر اعظم نے کہا کہ غریب آدمی کے پاس دودھ کے پیسے نہیں، ایک طرف اشرافیہ امپورٹڈ اشیا منگواتی ہے، امپورٹڈ اشیا پرپابندی سے لوکل انڈسٹریز کو فائدہ ہو گا، کاروباری حضرات پاکستان کے عظیم معمارہے، اگرہم اکٹھے ہو کر دن رات محنت کریں گے تو اگلے پانچ سے 10 سال میں ملک کی تقدیر بدل جائے گی،کاروباری حضرات ساری صورتحال کو سمجھتے ہیں، خدارا حکومت کوحل بتائیں، امپورٹڈ اشیا پرپابندی لگانے کا مقصد ڈالرمیں استحکام لانا ہے۔

انہوں نے کہا کہ ہمیں مشکل آن پڑی ہے، قربانی دینا پڑے گی، ہماری حکومت نے سستے ترین بجلی کے منصوبے لگائے، پاکستان نے اگر آگے بڑھنا ہے تو ایکسپورٹ پر توجہ دینا ہو گی، قومیں اس طرح نہیں بنتیں کہ بینک سے لون لیا اور پھر معاف کروا لیا۔