منی لانڈرنگ کیس: وزیراعظم اور وزیر اعلی ٰ پنجاب اسپیشل کورٹ سینٹرل پہنچ گئے

تفصیلات کے مطابق عدالت نے فرد جرم کے لیے شہباز شریف، حمزہ شہباز سمیت تمام ملزمان کو طلب کر رکھا ہے ۔ لاہور کی اسپیشل کورٹ سینٹرل میں منی لانڈرنگ ریفرنس کی سماعت شروع ہو گئی ہے۔ 

 اسپیشل پراسیکیوٹر نے سماعت کے دوران دلائل دیتے ہوئے کہا کہ مقدمے میں 3 ملزمان اشتہاری ہیں ان کے خلاف کارروائی کی جائے، سلمان شہباز، مقصود اور طاہر نقوی کو اشتہاری قرار دینے کی کارروائی کی جائے، جس پر جج اعجاز حسن اعوان نے کہا کہ یہ ملزمان تو مجسٹریٹ کی عدالت سے اشتہاری ہو چکے ہیں۔

اسپیشل پراسیکیوٹر نے یہ بھی کہا کہ یہ درخواست ریکارڈ پر آ گئی ہے، عدالت مناسب حکم جاری کر دے۔

دوران سماعت اسپیشل کورٹ کے جج اعجاز حسن اعوان کا کہنا ہے کہ میں جب اندر آ رہا تھا تو دیکھا کس طرح سیکیورٹی اہلکار گلے پڑے ہوئے ہیں، اگر یہ سیکیورٹی ہے تو اللّٰہ ہی حافظ ہے۔ ایسا کبھی نہیں دیکھا کہ جج اور وکیلوں کو روک رہے ہوں، عدالت نےایس پی سکیورٹی کو فوری کمرہ عدالت طلب کر لیا۔ 

دوران سماعت شہباز شریف کا کہنا تھا کہ عدالت کا وقار ہے اس لئے آیا ہوں کہ قانون کی حکمرانی ہو، میں نے کہا کسی کو نہ روکا جائے ۔عدالت نے ڈی ایس پی اور ایس ایچ او کو طلب کر لیا جس پر عدالتی اہلکار نے کہا کہ عدالت کا پیغام دونوں پولیس افسران کو دیا ہے لیکن وہ اندر آنے کو تیار نہیں۔

جج اعجاز حسن اعوان نے کہا کہ پولیس والوں کے یہ حالات ہیں، عدالت کا حکم نہیں مان رہے ۔

دوسری جانب ایف آئی اے منی لانڈرنگ کیس میں وزیراعظم شہباز شریف مقدمے سے بریت کی درخواست دائر کریں گے۔  وزیراعظم شہباز شریف کے وکلا نے درخواست تیار کرلی۔

خیال رہے کہ  شہباز شریف پر آج فرد جرم لگنے کاامکان ہے، شہباز شریف گزشتہ 3 پیشیوں سے حاضری استثنیٰ کی درخواست جمع کروا رہے تھے۔