پاک چین سفارتی تعلقات کے71 سال مکمل، وزیراعظم کی چینی صدر کومبارکباد

وزیراعظم شہباز شریف نے چین پاکستان سفارتی تعلقات کے قیام کی 71ویں سالگرہ پر صدر شی جن پنگ، دونوں ممالک کی حکومتوں اور عوام کو مبارکباد دیتے ہوئے کہا ہے کہ وقت کی کوئی آندھی، عالمی حالات کا کوئی طوفان اور حسد کی کوئی آگ اس فولادی بندھن پر اثر انداز نہیں ہوسکی، پختہ عزم ہے کہ آئرن برادرز کا یہ مثالی بندھن مزید بلندیوں، باہمی تعاون، اعتماد اور قربتوں کی نئی رفعتوں اور بلندیوں سے ہمکنار ہو۔

وزیراعظم نے اپنے تہنیتی پیغام میں  کہا کہ چین اور پاکستان دو بھائیوں کے نام ہیں ، دونوں ملکوں کی قیادت اور عوام نے گزشتہ اکہتر سال  میں دوستی کے سدا بہار درخت کو تقویت دی ہے  ۔

وزیر اعظم نے دونوں ملکوں کے اُن تمام رہنمائوں کو خراجِ تحسین پیش کیا جنہوں نے اس بے مثال دوستی کو تزویراتی شراکت داری اور آہنی بھائیوں کے تعلقات میں تبدیل کرنے کیلئے گرانقدر کوششیں کیں۔

وزیر اعظم نے کراچی واقعہ کے مجرموں کو انصاف کے کٹہرے میں لانے کا عزم ظاہر کیا۔

شہباز شریف نے کہا کہ چین پاکستان اقتصادی راہداری نہ صرف دونوں ملکوں بلکہ خطے کے دوسرے ملکوں کیلئے بھی اقتصادی تعاون، غربت کے خاتمے اور روابط کیلئے ایک مضبوط بنیاد فراہم کرتی ہے۔