آئی ایم ایف سے قرض کی قسط پیٹرول کی قیمت میں اضافے سے مشروط

تفصیلات کے مطابق قطر کے دارالخلافہ دوحہ میں 18 سے 25 مئی تک جاری رہنے والے مذاکرات میں آئی ایم ایف نے پاکستان کی جانب سے پالیسی ریٹ میں اضافے کا خیر مقدم کیا۔

آئی ایم ایف کے ساتھ مذکرات وزیرخزانہ مفتاح اسماعیل، وزیرمملکت برائے خزانہ عائشہ غوث پاشا، قائم مقام گورنراسٹیٹ بینک آف پاکستان اوردیگرحکام پر مشتمل اقتصادی ٹیم نے کیے۔

بتایا گیا ہے کہ آئی ایم ایف کی جانب سے پاکستان سے پیٹرول اوربجلی پر دی جانے والی سبسڈی کوختم کرنے کا مطالبہ کیا گیا ہے، حکومتی ٹیم تمام صورت حال سے وزیراعظم شہباز شریف کو آگاہ کرے گی،پاکستانی وفد وزیر اعظم سے بات چیت کے  بعد آئی ایم ایف کو جواب دے گا۔

میڈیا رپورٹس کے مطابق اقتصادی ٹیم نے آئی ایم ایف حکام کو اس بات سے بھی آگاہ کیا کہ حکومت اس وقت پیٹرول اوربجلی کی قیمت میں اضافہ کرنے کی متحمل نہیں ہوسکتی۔

آئی ایم ایف نے پاکستانی وفد کے ساتھ مذاکرات کا اعلامیہ جاری کیا ہے جس میں پیٹرول اور  بجلی پر دی جانے والی سبسڈیز ختم کرنے کا مطالبہ کیا گیا ہے۔