عمران کی گرفتاری کے خواب دیکھنے والے اپنی حکومت کی فکر کریں : پرویز الہی ٰ 

تفصیلات کے مطابق ایک بیان میں مسلم لیگ ق رہنما چوہدری پرویز الہٰی کا کہنا ہے کہ خواب دیکھنے پر کوئی پابندی نہیں ہے ، عمران خان کو گرفتار کرنے کا خواب دیکھنے والے اپنی حکومت کی فکر کریں ، حکومت آج یا کل گر جائے گی۔

ان کا کہنا تھا کہ رہنماؤں اور کارکنوں پر جھوٹے مقدمات درج کروانے سے تیاریوں میں کوئی فرق نہیں پڑے گا، عوام کی ایک ہی دہائی ہے اگر حکومت سنبھال نہیں سکتے تھے تو آئے کیوں؟

انہوں نے کہا کہ حکومت آج گری یا کل گری، حقیقی آزادی اور لانگ مارچ کی بھر پور تیاریاں جاری ہیں، حکمران ، عمران خان سے خوفزدہ ہیں،  جعلی حکمران ہر غیر قانونی کام کر رہے ہیں جس سے لانگ مارچ کو روکا جا سکے۔

انہوں نے مزید کہا کہ عوام کے ساتھ ساتھ آئی ایم ایف کو بھی عارضی حکومت پر اعتبار نہیں، حکومت کی جانب سے مہنگائی بم کی دوسری قسط جون میں آئے گی ، عمران خان نے روس کے ساتھ 30 فیصد سستے تیل کا معاہدہ کیا تھا، اگر اس پر عمل کیا جاتا تو آج ڈالر آسمان سے باتیں نہ کر رہا ہوتا، مہنگائی کی وجہ سے ملکی معیشت تباہی کے دہانے پر کھڑی ہے۔