وزیراعظم کی بی جے پی رہنما کی گستاخانہ بیان کی شدید مذمت

سماجی رابطے کی ویب سائٹ ٹوئٹر پر اپنے بیان میں وزیر اعظم نے بھارتیہ جنتا پارٹی (بی جے پی) کے رہنما کی جانب سے نبی کریمﷺ کی شان میں گستاخی کی شدید مذمت کرتے ہوئے مطالبہ کیا کہ دنیا بھارتی انتہا پسندی کا نوٹس لے۔

انہوں نے کہا کہ بارہا کہہ چکے ہیں فاشسٹ مودی کی قیادت میں بھارت مذہبی آزادیوں کو پامال کررہا ہے، بھارت میں مسلمانوں پر شدید ظلم وستم کیا جارہا ہے۔

وزیر اعظم نے کہا کہ ہمارے لیے نبی کریم ﷺ کی محبت سے بڑھ کر اور کچھ نہیں ہے، تمام مسلمان نبی کریم ﷺ کی محبت، ناموس کیلئے اپنی زندگی قربان کرسکتے ہیں۔

خیال رہے کہ بھارتیہ جنتا پارٹی کی ترجمان نوپور شرما نے نبی کریم ﷺ کی شان میں گستاخانہ بیان دیا تھا، جس پر دنیا بھر میں مسلمانوں میں سخت غم و غصہ پایا جاتا ہے۔ عرب ممالک میں بھی نوپور شرما اور بھارت کے خلاف شدید احتجاج جاری ہے اور مختلف عرب ممالک نے بھارتی مصنوعات کا بائیکاٹ شروع کر دیا ہے۔