وزیر خارجہ اسحاق ڈار سلامتی کونسل کے اجلاس میں شرکت کیلئے نیویارک جائیں گے

اسلام آباد:نائب وزیر اعظم محمداسحاق ڈار کل سلامتی کونسل کے اجلاس میں شرکت کیلئے نیویارک کا دورہ کریں گے۔

ترجمان دفتر خارجہ طاہر اندرابی کے مطابق نائب وزیر اعظم فلسطین کی صورتحال پر سلامتی کونسل کی بریفنگ میں شرکت کریں گے۔نائب وزیراعظم فلسطین پر پاکستان کے اصولی مؤقف کی توثیق کریں گے۔

ترجمان نےمزید بتایا کہ نائب وزیر اعظم مغربی کنارے پراسرائیلی کنٹرول بڑھانے کے غیر قانونی فیصلوں کی پاکستان کی شدید مخالفت کا اعادہ کریں گے۔محمداسحاق ڈار غزہ میں مستقل جنگ بندی پر زور دیں گے۔سلامتی کونسل کی قرارداد 2803 پر مکمل عمل درآمد کامطالبہ کیا جائے گا۔

نائب وزیر اعظم فلسطین میں منصفانہ اور دیرپا امن کی حمایت کے لیے عالمی اور علاقائی شراکت داروں بشمول آٹھ عرب اور اسلامی ممالک کے گروپ اور امریکہ کے ساتھ پاکستان کی مسلسل روابط کو اجاگر کریں گے ۔دورے کے دوران مختلف ملکوں کے رہنماؤں سے ملاقاتیں بھی کریں گے۔