پاکستان کی معیشت اس وقت وینٹی لیٹر پر ہے:مریم نواز

سوشل میڈیا ٹیم سے خطاب میں مریم نواز نے کہا کہ سوشل میڈیا ٹیمیں بہتر کام کررہی ہیں، سوشل میڈیا ٹیم کو دل کی گہرائیوں سے مبارکباد دیتی ہوں، سوشل میڈیا کی افادیت آج بڑھ رہی ہے، ہم سب نے ایک نئے جذبے کے ساتھ پاکستان کی خدمت کرنی ہے۔

انہوں نے کہا ہے کہ نوازشریف نے ملکی معیشت کی بہتری کے لیے دن رات محنت کی، اقتدار ملا تو اس وقت 20-20 گھنٹے لوڈ شیڈنگ ہوتی تھی، نوازشریف کے پاس کوئی جادو کی چھڑی نہیں تھی انہوں نے دن رات محنت کی،75 سالوں سے سن رہے ہیں ملک نازک دورسے گزر رہا ہے،عوامی مینڈیٹ لینے والی جماعتوں کو چلنے نہیں دیا جاتا،

مریم نواز نے کہا کہ سابق دور میں ہر شعبے کو تباہ کیا گیا،اس وجہ سے حکومت لی کہ ملک کو موجودہ صورت حال میں آگے لے کر جانا ہے،چینی کی قیمت دوبارہ 70سے80 روپے پر لے کر آئے ہیں،وزیراعظم نے اسپتالوں میں ادویات فراہم کرنے کی ہدایت کی ہے،عوام سے وعدہ کرتے ہیں ملک ترقی کی نئی راہ پر چلے گا۔

سابق وزیر اعظم عمران خان کو تنقید کا نشانہ بناتے ہوئے مریم نواز نے کہا کہ ایک بچہ جس کی عمر 70سال سے اوپر ہے وہ انقلاب لانے نکلا ہے، گھر سے نکلا بچہ ابھی تک گھر نہیں پہنچا، نااہل شخص نے اقتدار کی ہوس میں اسلام آباد میں جلاؤ گھیراؤ کیا، سپرپاور ملک کو دھمکیاں دینے والا آج کل راہداری ضمانت پر گھوم رہا ہے۔