پنجاب کے ترقیاتی بجٹ کا پہلا مسودہ تیار کر لیا گیا

صوبہ پنجاب کے ترقیاتی بجٹ کا پہلا مسودہ تیار کر لیا گیا ، مسلم لیگ ن اور اتحادیوں کے ہر ایم پی اے کو 50 کروڑ کی ترقیاتی اسکیمیں دی جائیں گی۔

تفصیلات کے مطابق پنجاب کے ترقیاتی بجٹ کے پہلے مسودے میں صوبے کا ترقیاتی بجٹ 587 ارب روپے مختص کرنے کی تجویز دی گئی ہے ، جنوبی پنجاب کیلئے 35 فیصد تک بجٹ مختص کرنے کی سفارش کی گئی ہے جب کہ پنجاب میں مجموعی طور پر 13 میگا ترقیاتی پروجیکٹ شروع کرنے کی تجویز ہے ۔ 

صوبائی بجٹ کے مسودے سے معلوم ہوا ہے کہ پنجاب میں ضلعی ترقیاتی پروگرام کے منصوبوں کے لیے 114 ارب مختص کرنے کی تجویز ہے ، میگا منصوبوں کیلئے 237 ارب روپے مختص کرنے کی تجویز دی گئی ہے جب کہ پرائیویٹ پارٹنر شپ کے تحت 15 ارب روپے مختص کرنےکی سفارش ہے۔ 

علاوہ ازیں ملک بھر کا مجموعی ترقیاتی بجٹ 2 ہزار184ارب روپے رکھنے کی تجویز ہے ، جس میں وفاق کا ترقیاتی بجٹ800 ارب ، خیبر پختونخواہ کیلئے299 ، ضم شدہ قبائلی علاقوں کا 50 ارب ، پنجاب 585 ارب ، سندھ 355 اور بلوچستان کیلئے 143 ارب روپے رکھنے کی تجویز ہے ، صوبوں کی اے پی سی سی میں1384 ارب ترقیاتی بجٹ کی تجویز ہے ، ارکان قومی اسمبلی کی پبلک اسکیم کیلئے 91 ارب روپے، آزاد جموں کشمیر اور گلگت کیلئے 95 ارب روپے بجٹ رکھا جائے گا۔

اس حوالے سے وفاقی وزیر منصوبہ بندی احسن اقبال کا کہنا ہے کہ اگلے سال ترقیاتی بجٹ کا جحم 800 ارب ہوگا، 2018 میں حکومت چھوڑی تو ترقیاتی بجٹ 1000 ارب روپے تھا ، جاری منصوبوں کی تکمیل حکومت کی اولین ترجیح ہوگی ، خزانہ خالی ہونے کے باعث پی ایس ڈی پی ترتیب دینا مشکل کام تھا ، آئندہ بجٹ میں پی ایس ڈی پی کے تحت تمام صوبوں اور وزارتوں کی سفارشات کا جائزہ لیا ، ماضی میں سیاسی بنیادوں پر ترقیاتی اسکیمیں شامل کی گئیں،

گزشتہ حکومت کی غلط پالیسیوں کی وجہ سے پورٹ اینڈ شپنگ اور گوادر کے منصوبے متاثر ہوئے ، پانی ذخیرہ کرنے کیلئے ڈیم کی تعمیر اور اعلیٰ تعلیم ہماری ترجیح ہو گی، انفارمیشن اور سائنس و ٹیکنالوجی کیلئے انوویشن فنڈ کے نام سے خطیر رقم رکھی جائے گی۔