آرمی چیف کی سربراہی میں اعلیٰ فوجی قیادت کا دورہ چین مکمل

پاک فوج کے شعبہ تعلقات عامہ کے مطابق پاکستان کی تینوں مسلح افواج کی سینئر قیادت کے وفد کا دورہ چین 9 سے 12جون کے درمیان ہوا جس کی قیادت آرمی چیف جنرل قمر جاوید باجوہ نے کی۔

دورہ چین کے دوران 12جون کو ہونے والے ایپکس کمیٹی کے اجلاس کی قیادت آرمی چیف جنرل قمر جاوید باجوہ نے کی جس میں چین کی جانب سے وائس چیئرمین سینٹرل ملٹری کمیشن جنرل ژانگ نے شرکت کی۔

آئی ایس پی آر کے مطابق پاکستانی فوجی وفد نے چین کے دیگر سرکاری اداروں کے سینیئر حکام سے بھی ملاقاتیں کیں، پاکستان اور چین کی اعلیٰ عسکری قیادت نے اسٹریٹجک شراکت داری پر عزم کا اعادہ کیا ہے۔

پاک چین فوجی قیادت نے عالمی و علاقائی سکیورٹی کی صورتِ حال پر گفتگو کی،دفاعی تعاون کے لیے مکمل اعتماد کا اظہار کیا،دونوں ممالک نے باہمی مفاد کے تناظر میں وفود کے تبادلے پر بھی اتفاق کیا۔

پاک فوج کے ترجمان ادارے کے مطابق دونوں ممالک کی فوجی قیادت نے مشترکہ مفادات کے تحفظ کے لیے رابطوں میں تسلسل، تربیت، ٹیکنالوجی اور انسدادِ دہشت گردی میں تعاون بڑھانے پر اتفاق کیا ہے،پاکستان کی اعلیٰ عسکری قیادت کا دورہ چین مشترکہ فوجی تعاون کمیٹی کا حصہ ہے۔