پاکستان کی مقبوضہ جموں وکشمیرمیں نوجوانوں کے ماورائے عدالت قتل کی مذمت

بھارتی قابض افواج نے گزشتہ روزپلوامہ اورسرینگرکے اضلاع میں محاصرے اورتلاشی کی کارروائیوں کے دوران چاربے گناہ کشمیریوں کووحشیانہ طور پر قتل کردیاتھا۔

دفترخارجہ کے ترجمان عاصم افتخارنے ایک بیان میں کہا کہ یہ انتہائی افسوسناک ہے کہ بھارت کے غیرقانونی زیرقبضہ جموں وکشمیرمیں کشمیری نوجوانوں کا بہیمانہ قتل روزکامعمول بن چکاہے ۔

انہوں نے کہاکہ پانچ اگست 2019 کے غیرقانونی اوریکطرفہ اقدامات کے بعد سے بھارتی قابض فوج کے ہاتھوں621 سے زائدکشمیری شہید ہوچکے ہیں۔

ترجمان نے بھارت پرزوردیاکہ وہ اس حقیقت کا ادراک کرے کہ لاک ڈائون ،ظالمانہ فوجی محاصرے اور طاقت کے اندھے دھند استعمال کے ذریعے غیرقانونی قبضے کے خلاف کشمیریوں کی جدوجہدکے جذبے کو کم نہیں کیا جا سکتا۔

عاصم افتخارنے بھارت کے غیرقانونی زیرقبضہ جموں وکشمیر میں ماورائے عدالت قتل کے واقعات کی ایک آزاد تحقیقاتی کمیشن کے ذریعے تحقیقات کے پاکستان کے مطالبے کااعادہ کیا جس کی سفارش اقوام متحدہ کے انسانی حقوق کمیشن نے کشمیر کے حوالے سے 2018 اور 2019 کی اپنی رپورٹوں میں کی ہے۔