برلن:وزیر مملکت برائے خارجہ حنا ربانی کھر نے کہا ہے کہ پاکستان کے گرے لسٹ سے نکلنے کا کریڈٹ جس کو لینا ہے لے لے۔
ایف اے ٹی ایف کے اجلاس میں شرکت کے لیے برلن میں موجود وزیر مملکت برائے خارجہ امور حنا ربانی کھر نے کہا ہے کہ پاکستان کے گرے لسٹ سے نکلنے کا کریڈٹ جس کو لینا ہے لے لے،ہمارا کام ہے پاکستان کو مشکل سے نکالنا ہے۔
انہوں نے کہا کہ پاکستانی معیشت کی ترقی کے لیے گرے لسٹ سے نکلنا نا گزیر ہے، پاکستان نے بہت لمبا سفر طے کیا ہے، ہم اس بات کو یقینی بنائیں گے کہ پاکستان جو حاصل کر چکا اسے کھو نہ دیں۔
اس سے قبل ٹوئٹر پر جاری ایک پیغام میں حنا ربانی نے کہا کہ ایف اے ٹی ایف آج رات اجلاس کے اختتام کے بعد عوامی بیان جاری کرے گا، نتائج یا قیاس آرائی پر مبنی رپورٹنگ سے گریز کرنا چاہیے،معاملے پر کل صبح دفتر خارجہ میں میڈیا بریفنگ دی جائے گی۔
وزیر مملکت برائے خارجہ کے بیان کے بعد حکومتی ترجمان مریم اورنگزیب نے بھی کہا کہ فنانشل ایکشن ٹاسک فورس (فیٹف) کی گرے لسٹ سے پاکستان کا نام نکلنے یا نہ نکلنے سے متعلق قیاس آرائیاں مناسب نہیں، ایسا نہ کیا جائے۔
انہوں نے کہا کہ جرمنی میں منعقدہ فنانشل ایکشن ٹاسک فورس کے اجلاس کا بیان آج شب جاری ہونا ہے، وزارت خارجہ کی جانب سے کل بروز ہفتہ کو اس متعلق تفصیلات بیان کی جائیں گی۔
قبل ازیں رہنما تحریک انصاف شہباز گل نے فیٹف کے معاملے پر مبارکباد دیتے ہوئے کہا تھا کہ پاکستان کو ایف اے ٹی ایف کی گرے لسٹ سے نکال دیا گیا ہے، سابق وزیراعظم عمران خان کی خصوصی توجہ سے ان کی ٹیم نے وہ کام کر دکھایا جو پہلے کسی نے نہیں کیا۔
شہباز گل نے اپنے ٹوئیٹر پیغام میں مزید کہا کہ میں نے چند دن پہلے ہی کہا تھا کہ اب ارسطو اس کا کریڈٹ لینے کی کوشش کرے گا، ان چوروں نے ہی ہمیں گرے لسٹ میں شامل کروایا تھا۔
واضح رہے کہ سوشل میڈیا پر پاکستان کے فیٹف گرے لسٹ سے نکلنے سے متعلق بحث جاری ہیں جبکہ حکومت کی جانب سے اس متعلق ابھی تک کوئی با ضابطہ بیان جاری نہیں کیا گیا ہے۔
