مونس الہٰی کی جائیداد و کاروبار سے متعلق ایف آئی اے کے مراسلے

مسلم لیگ (ق) کے ایم این اے مونس الہٰی کے خلاف منی لانڈرنگ کیس کے معاملے پر ایف آئی اے نے تفتیشی عمل تیز کردیا ہے، ادارے کی جانب سے مونس الہٰی کی جائیداد اور کاروبار  کی معلومات کے لیے مختلف اداروں کو مراسلے جاری کیے گئے ہیں۔

ذرائع کا کہنا ہے کہ اسٹیٹ بینک، ایکسائز اینڈ ٹیکسیشن اور لاہور ڈیولپمنٹ اتھارٹی (ایل ڈی اے) کو مراسلے جاری کیے گئے ہیں۔

ذرائع ایف آئی اے کا کہنا ہے کہ محکمہ مال، کمشنر لاہور اور کمشنر گجرات کو بھی مراسلہ جاری کیا گیا ہے، مراسلے میں مونس الہٰی کی منقولہ اور غیرمنقولہ جائیدادوں کی تفصیلات طلب کی گئی ہیں۔

ذرائع ایف آئی اے کا کہنا ہے کہ مونس الہٰی کے بینک اکاؤنٹس کی تفصیلات بھی طلب کی گئی ہیں۔