اسحاق ڈار کی وطن واپسی کا فیصلہ، وزیر خزانہ بنائے جانے کا امکان : ذرائع 

جی این این کے مطابق ذرائع ن لیگ کا کہنا ہے کہ  اسحاق ڈار کا جولائی کے دوسرے ہفتے میں پاکستان آنےکا امکان ہے۔

ذرائع کے مطابق   وطن واپس آکر اسحاق ڈار  پہلے بطور سینیٹر اپنا حلف لیں گے جس کے بعد وہ وفاقی وزیرخزانہ کا قلمدان سنبھالیں گے۔

ذرائع کا کہنا ہے کہ اسحاق ڈار کی وطن واپسی کا فیصلہ ن لیگ کے قائد نوازشریف نے کیا، نوازشریف کا کہنا ہے کہ موجودہ صورتحال میں اسحاق ڈارہی معیشت کوسنبھال سکتے ہیں ،  نوازشریف کا موقف ہے کہ پہلے بھی اسحاق ڈارنے مشکل حالات میں معیشت بہتربنانے میں کردار ادا کیا تھا۔

خیال رہے کہ موجودہ وزیر خزانہ مفتاح اسماعیل رکن پارلیمنٹ نہیں ہیں اس لیے وہ 6 ماہ تک وزارت کے عہدے پر نہیں رہ سکتے۔ 

واضح  رہے کہ سابق وزیر خزانہ اسحاق ڈار پر آمدن سے زائد اثاثے بنانےکا کیس ہے اور وہ نومبر 2017 میں علاج کی غرض سے لندن گئے تھے اور اس کے بعد سے وطن واپس نہیں آئے۔