زبان مختلف ثقافتوں کو متحد کرنے کا ایک موثرذریعہ ہے : مریم اورنگزیب

تفصیلات کے مطابق وزیراطلاعات و نشریات مریم اورنگزیب نے علامہ اقبال اوپن یونیورسٹی میں لینگوئج ڈاکیومنٹیشن کے موضوع پر چار روزہ بین الاقوامی تربیتی ورکشاپ  میں شرکت کی ،  وزیر اطلاعات نے زبانوں کی اہمیت کو اجاگر کرنے اور انہیں ترقی دینے کیلئے اقدامات کرنے پر  یونیورسٹی کو سراہا۔

انہوں نے افسوس کا اظہار کیا کہ پاکستان میں بولی جانے والی 80 زبانوں میں سے 26 کو اپنی بقاء کا خطرہ لاحق ہے۔

مریم اورنگزیب  نے کہا کہ اس ورکشاپ سے ایک نیا باب کھلے گا جس سے زبان اور ثقافت کے درمیان رابطے کو نمایاں کرنے میں مدد ملے گی۔

انہوں نے یقین دلایا کہ حکومت ملک میں زبانوں کے تحفظ اور فروغ کیلئے LINGAISTIC مینجمنٹ کا نظام قائم کرنے میں علامہ اقبال اوپن یونیورسٹی کی معاونت کرے گی۔

وزیر اطلاعات نے اعلان کیا کہ ریڈیو پاکستان اور پاکستان ٹیلی ویژن زبان کی اہمیت کو فروغ دینے کیلئے پروگرام نشر کریں گے۔

ان کا مزید کہنا تھا کہ  اطلاعات و نشریات کی وزارت اس مقصد کیلئے ڈیجیٹل سمیت اپنے تمام پلیٹ فارمز فراہم کرنے کو تیار ہے۔