ملک کے مختلف شہروں میں آج سے مون سون کا آغاز 

محکمہ موسمیات کے مطابق پنجاب کے مختلف شہروں میں 30 جون سے 4 جولائی کے دوران تیز ہواوں اور گرج چمک کے ساتھ بارشوں کا امکان ہے۔ 

محکمہ موسمیات کاکہنا ہے کہ  لاہور گوجرانولہ فیصل آباد سرگودھا سمیت دیگر اضلاع میں  موسلادھار بارشیں متوقع ہیں ،  صوبائی دارالحکومت لاہور  میں بارشوں کی وجہ سے نشیبی علاقے زیر آب آنے کا بھی خطرہ ہے۔  اس حوالے سے  لاہورکے  تمام متعلقہ اداروں کو الرٹ  کردیا گیا ہے ۔ 

دوسری جانب سندھ کے ساحلی علاقوں ٹھٹھہ، بدین، تھرپارکر میں بھی چند مقا مات پر گرج چمک کے ساتھ بارش کی پیشگوئی ہے ، بلوچستان کے مختلف علاقوں اور کشمیر میں بھی بادل برسنے کی توقع ہے۔

گزشتہ رات کراچی کے مختلف علاقوں میں ہلکی بارش کے بعد موسم خوشگوار ہوگیا،  آئی آئی چندریگر روڈ، سپر ہائی وے، ڈیفنس، محمود آباد اور نارتھ کراچی میں بادل برسے۔

پی ڈی ایم اےکاکہنا ہے کہ مسافر اور سیاح اس دوران غیر ضروری سفر سے گریز کریں ، پی ڈی ایم اے نے کسی بھی ہنگامی صورتحال سے نمٹنے کے لئے تمام متعلقہ اداروں کو ہائی الرٹ رہنے کی ہدایت کی ہے۔