وزیراعلی پنجاب کا انتخاب ، صوبائی اسمبلی کا اجلاس آج ہوگا

تفصیلات کے مطابق پنجاب اسمبلی کا اجلاس آج اسمبلی ہال میں شام 4 بجے ہوگا ، اجلاس کی صدارت ڈپٹی اسپیکر سردار دوست مزاری کریں گے۔

وزیراعلی پنجاب کے لئے مسلم لیگ ن اور اتحادیوں کے امیدوار حمزہ شہباز ہوں گے جبکہ تحریک انصاف اور مسلم لیگ ق کے امیدوار چوہدری پرویزالہی ہوں گے ، وزیر اعلیٰ پنجاب کے شفاف الیکشن کے انعقاد کے لیے اسمبلی سیکرٹریٹ نے ضابطہ اخلاق جاری کردیا ، اراکین اسمبلی اور اسمبلی سٹاف کے مہمانوں پر مکمل پابندی ہو گی ۔

سپیکر باکس، آفیسر باکس اور مہمانوں کی گیلریز بند ہوں گی ، میڈیا پریس گیلری کے ذریعے وزیر اعلیٰ پنجاب کے الیکشن کی کوریج کریں گے ، ایوان میں موبائل فون لے جانے پر پابندی ہو گی۔

واضح رہے کہ لاہور ہائی کورٹ کے حکم پر وزیراعلیٰ پنجاب کے انتخاب کے لیے آج دوبارہ ووٹوں کی گنتی کروائی جا رہی ہے جبکہ تحریک انصاف نے فیصلے کے خلاف سپریم کورٹ میں درخواست دائر کر دی ہے ۔  تحریک انصاف نے ہائیکورٹ کے فیصلے کے خلاف دائر اپیل کو آج ہی سماعت کے لیے مقرر کرنے کی استدعا کی ہے۔

لاہور ہائی کورٹ نے وزیراعلیٰ حمزہ شہباز کے انتخاب کے خلاف دائر درخواستوں پر فیصلے میں قرار دیا تھا کہ سپریم کورٹ کے فیصلے کی روشنی میں منحرف ہونے والے 25 ارکان کے ووٹوں کو نکال کر ووٹوں کی گنتی دوبارہ کروائی جائے اور جیتنے والے وزیراعلیٰ  ہفتے  کو دوبارہ حلف لیں۔

پنجاب اسمبلی کے ایوان میں اراکین

پنجاب اسمبلی کے ایوان میں اراکین کی کل تعداد 371 ہے تاہم 25 ارکان منحرف ہونے پر ڈی سیٹ ہونے کے بعد یہ تعداد 346 رہ گئی ہے اور وزیراعلیٰ کے لیے درکار سادہ اکثریت کسی گروپ کے پاس نہیں۔ 

عدالتی فیصلے میں کہا گیا ہے کہ اگر ایوان کی سادہ اکثریت یعنی 186 کسی کے پاس نہ ہو تو پھر جس رکن کے پاس موجود ارکان کی سادہ اکثریت ہو وہی وزیراعلیٰ منتخب ہو جائے گا۔