مولانا فضل الرحمان طبیعت کی ناسازی کے باعث اسپتال داخل، وزیراعظم کی عیادت

وزیراعظم شہباز شریف نے لاہور کے نجی اسپتال میں پاکستان ڈیموکریٹک موومنٹ (پی ڈی ایم) کے صدر مولانا فضل الرحمان کی عیادت کی اور ان کی جلد صحتیابی کے لیے نیک خواہشات کا اظہار کیا۔

وزیراعظم شہباز شریف نے ماڈل ٹاؤن کے نجی اسپتال میں مولانا فضل الرحمان کی عیادت کی، گلدستہ پیش کیا اور جلد صحتیابی کے لیے نیک خواہشات کا اظہار کیا۔

وزیراعظم نے اسپتال انتظامیہ کو ہدایت کی کہ وہ مولانا فضل الرحمان کا بہترین علاج یقینی بنائیں۔

ترجمان جے یو آئی کے مطابق مولانا فضل الرحمان کو لبلبے کا عارضہ ہے، ٹیسٹ رپورٹ آنے پر ڈاکٹرز ان کا مزید علاج تجویز کریں گے، اسپتال سے فارغ ہونے کے بعد وہ حج پر جائیں گے۔