گراؤنڈ میں پوری کوشش کرنی ہے،ہار نہیں ماننی، آخر میں کامیابی اللہ دیتا ہے:عمران خان

لاہور میں حلقہ پی پی 158 کے علاقے دھرمپورہ میں انتخابی جلسے سے خطاب کرتے ہوئے سابق وزیراعظم نے کہا کہ دھرم پورہ میں پہلی بار آیا ہوں، میں نے26 سال چند لوگوں کے ساتھ سیاست شروع کی،آج میں اپنے دوست عبد القادر کو خراج تحسین پیش کرتا ہوں، وہ آج ہم میں نہیں ہے، دھرم پورہ سے تعلق رکھنے والا عبدالقادر میرے کھلاڑی دوستوں میں پہلا شخص تھا، 26 سال پہلے جب میں نے سیاسی جدوجہد شروع کی تو عبدالقادر میرے ساتھ کھڑا ہوا۔

انہوں نے کہا کہ پاکستان دنیا کا واحد ملک ہے جو اسلام کے نام پر بنا، ہم نے اللہ سے کامیابی کی دعا کرنی ہے، آپ لوگوں نے ایک ایک گھر جانا ہے اور بتانا ہے کہ یہ سیاست نہیں جہاد ہے، گراؤنڈ میں پوری کوشش کرنی ہے،ہار نہیں ماننی، آخر میں کامیابی اللہ دیتا ہے۔

سابق وزیر اعظم نے کہا کہ ان لوٹوں کو ہم نے شکست دینی ہے، نوجوانوں یہ الیکشن ہم نے جیتنا ہے،یہ کوئی اقتدار کی نہیں بلکہ ہم سب کی جنگ ہے، یہ لوگ ہمیں نیوٹرل امپائر سے نہیں ہرا سکتے، یہ امپائر کو ساتھ ملا کر ہمیں شکست دینے کی کوشش کریں گے، یہ لوگ30سال سے ملک پر ڈاکے مار رہے ہیں، ہم نے ان غداروں کا مقابلہ کرنا ہے۔

ای وی ایم پر بات کرتے ہوئے عمران خان نے کہا کہ اڑھائی سال سے کوشش کرتا رہا کہ آئندہ انتخابات شفاف ہوں، ہم نے الیکشن میں شفافیت کے لیے اقدامات اٹھائے، ای وی ایم بنائی اور انہوں نے آتے ہی ای وی ایم کا خاتمہ کیا، الیکشن کی شفافیت کے راستے بند کر دیے، انہوں نے بات جاری رکھتے ہوئے کہا کہ ای وی ایم مشین استعمال سے دھاندلی ختم ہو سکتی ہے، بھارت اور ایران میں ای وی ایم مشین استعمال ہو رہی ہے۔