ملک بھر میں آج شب برأت عقیدت و احترام سے منائی جائیگی

اس رات فرزندان اسلام اپنے گھروں میں ہی شب بیداری ، رات بھرنوافل، ذکراورخصوصی عبادات کرتے ہوئے گزاریں گے،  اہل علم اس شب کو رزق، صحت، زندگی، موت اور خیر و شر کے فیصلوں کی رات بھی کہتے ہیں، اس لیے اہل ایمان اس رات مغفرت اور بخشش مانگتے ہیں اور اللہ تعالی سے رحمت اور فضل کی التجائیں بھی کرتے ہیں۔

شب برات کو لیلتہ المبارکہ یعنی برکتوں والی رات لیلتہ الصک یعنی تقسیم امور کی رات اور لیلتہ الرحمتہ یعنی رحمت نازل ہونے کی رات بھی کہا جاتا ہے۔شب برات کے موقع پر ملک بھر کی تمام چھوٹی بڑی مساجد میں محافل اور ذکر کی تقاریب کا اہتمام کیا جائے گا، جس میں علماء کرام، خطیب حضرات اور مقررین شب برات کی فضیلت بیان کریں گے۔

شب برأت کی مناسبت سے نذر و نیاز کا بھی خصوصی اہتمام کیا جاتا ہے جبکہ اور بڑی تعداد میں لوگ قبرستانوں کا رُخ کر کے اپنے پیاروں کی قبروں پر  پھول چڑھانے کے ساتھ ساتھ ان کی مغفرت کے لیے فاتحہ خوانی کرتے ہیں۔ چیئرمین مرکزی رویت ہلال کمیٹی مولانا عبد الخیر آزاد نے ایک بیان میں عوام سے اپیل کی ہے کہ وہ شب برات پر اللہ تعالی سے معافی مانگیں ، ایسا لگتا ہے کہ  کورونا کا  وبائی مرض تیزی سے ہر جگہ  پھیل رہا ہے ، انہوں نے کہا کہ  مہلک بیماری کے پھیلاؤ کو کنٹرول کرنے کے لئے خاص طور پر مساجد میں COVID-19 سے بچاؤ کیلئے احتیاطی تدابیر  پر سختی سے عمل کیاجائے ۔